Córdoba

Vun Wikipedia
Wesseln na: Navigatschoon, Söök

Córdoba is ene südspaansche Provinzhööftstadt twüschen de Sierra de Córdoba (466 m) un den Guadalquivir. Se hett 320.000 Inwahners.

Córdoba weer in de röömsche Tiet de Hööftstadt van de Provinz Hispania Ulterior un wurr 711 van de Arabers innahmen. De Stadt harr ehre beste Tiet, as se Hööftstadt weer van dat spaansche Kalifat, besunners unner Abderahman III. (912-960). Se schall domaals 800.000 Inwahners un 300 Moscheen hatt hebben.

De Moschee in Córdoba

Córdoba is beröhmt wegen de ehrmalige Moschee, de in dat 8. un 10 Jahrhunnert boot wuurn is un de na de Kaaba in Mekka dat gröttste islamische Beedhuus van de Welt weer. Na de Reconquista wurr de Moschee dör den Inbo van ene Choranlaag in ene Kark verwannelt. So wurr de reine maurische Stil van dat Bowark tonicht maakt. Sülvst Karl V., de den Umbo genehmigt harr, weer bannig untofreden mit dat, wat darbi rutkamen weer.

De ganze Kumplex van de Moschee is van ene hoge Müür umgeven. De Binnenruum is blots 11,50 m hooch un süht mit siene 850 Marmorsülen un rootwitten Hoofiesenbagens so ut as en Labyrinth.

Over den Guadalquivir geiht de Röömsche Brügg mit 16 Bagens. De Fundamenten stammt van de Römers, de Brügg sülvst ut de maurische Tiet.

Weblenken[ännern | Bornkood ännern]

Commons-logo.svg Córdoba. Mehr Biller, Videos oder Audiodateien to’t Thema gifft dat bi Wikimedia Commons.