Björn Borg

Vun Wikipedia
Wesseln na: Navigatschoon, Söök

Disambig.svg Dit Woort hett noch annere Bedüden: kiek dorför ünner Björn Borg (Swemmer).

Björn Borg, 2011

Björn Rune Borg (Loudspeaker.svg Anhören D; * 6. Juni 1956 in Södertälje) is en ehmoligen swedischen Tennisspeler.

In’n Verloop vun sien teemlich korte Loopbahn hett Borg 64 Enkelttitels wunnen, dorünner ölven Grand-SlamTitels[1]. In de Johren 1976 bit 1980 hett he fiefmol in de Reeg dat Turneer vun Wimbledon wunnen, in de Johren vun 1974 bit 1981 hett he sössmol den Titel bi de French Open haalt un 1975 bröch he den Davis Cup to’n eersten mol Sweden. Butendem weer he tweemol Sieger vun’t Tennis-Masters as Afsluss vun de Saison bi de Mannslüüd. 1979 un 1980 weer he an de Spitz vun de Tennis-Weltranglist. In de tweeten Hälft vun de 1970er Johren un Anfang vun de 1980er Johren weer he een vun de föhren Spelers un tellt to de besten Spelers vun de hele Tennishistorie.

Loopbahn[ännern | Bornkood ännern]

Borg töög al 1972 in’t Öller vun 15 Johren grote Acht op sik, as he för Sweden sien eerst David-Cup-Speel wunnen hett. In’t glieke Johr hett he ok den Junioren-Titel in Wimbledon wunnen. Dat Johr dorop speel Borg sien eerste vullstännig Saison op de Profitour un is bi de French Open as ok bi de US Open bit in’t Achtelfinale kamen. In Wimbledon keem he sogor bit in’t Veerderlfinale.

Sien eersten Profititel hett he 1974 een Maand vör sien achteihnsten Geboortsdag bi de Italian Open wunnen. In dat glieke Johr hett he noch wietere söss Titel maakt, dorünner ok bi de French Open, de Borg to de Tiet as jüngste Speler wunnen hett. To’n Saisonafsluss stünn Borg op den drüdden Platz vun de Weltranglist. In’t Johhr 1975 güng dat mit sien Opstieg spoodriek wieter. Fief Turneeren hett he wunnen, dorünner ok wedder bi de French Open, woneem he dat Finale gegen Guillermo Vilas speelt hett. In Wimbledon weer he wedder in’t Veerdelfinale un bi de US Open sogor in’t Halffinale. He bleev op’n drüdden Platz vun de Weltranglist, föhr sien Mannschop an’t Enn vun de Saison aver to’n eersten sweedschen Davis-Cup-Sieg gegen de Tschechoslowakei, as he sien beiden Enkeltspelen wunnen hett.

Dat Johr dorop stünn he eerstmols in’t Finale vun Wimbledon, dat he gegen den favoriseerten Ilie Năstase wunnen hett. Disse Spood vun Borg, de an sik op Sandplätz an’n Besten speel, weer en middlere Sensatschoon to de Tiet. Man, bi de groten SAndplatzturneeren bleev he dat Johr dör ahn Spood, vun wegen dat he jümmer wedder an den Eersten vun de Weltranglist, Jimmy Connors, verleren de. Sien Wimbledon-Sieg hett he 1977 gegen Connors in en Endspeel över fief Sätz wedderhalen künnt. En Tiet lang stünn he nu sülvst op den eersten Platz vun de Weltranglist. He hett in de Saison tohopen ölven Turneeren wunnen un weer dormit een vun de dree besten Spelers vun de Welt. 1978 weer he opletzt de bestimmen Speler vun de Profitour. In dat Johr hett he de French Open un ok Wimbledon wunnen, weer bi de US Open aver wedder vun Connors slahn. Dat Johr dorop wünn he alltohopen twölf Titels un weer nu to’n Saisonafsluss an de Spitz vun de Weltranglist un wünn ok to’n eersten mol in sien Loopbahn den Masters to’n Saisonafsluss, de erst in’n Januar 1980 utdragen weer.

Rekord-Grand-Slam-Winners (Mannslüüd)
Rang Tennisspeler Tall
1. Flag of Switzerland.svg Roger Federer 16
2. Flag of the United States.svg Pete Sampras 14
3. Flag of Australia.svg Roy Emerson 12
4. Flag of Sweden.svg Björn Borg 11
Flag of Australia.svg Rod Laver
6. Flag of the United States.svg Bill Tilden 10
Stand: 31. Januar 2010

Den drüdden Dubbelsieg vun French Open un Wimbledon in Reeg keem 1980, wat noch bit hüüt as een vun de gröttsten Leistungen vun de Tennishistorie tellt. Bi de US Open hett he dorgegen dat drüdde mol in Reeg verloren, dit mol gegen den opstreven US-Amerikaner John McEnroe. Liekers leeg Borg an’t Enn vun de Saison wedder vörn de Weltranglist. Sien letzte grote Saison weer 1981. To’n drüdden mol in sien Loopbahn stünn he in dree Grand-Slam-Turneeren in’t Endspeel. Wiel he in Paris wedder Spood harr, müss he sik in Wimbledon dit mol gegen John McEnroe slahn geven. In Genf hett Borg in’n September 1981 sien 64. un dormit letzt Turneer vun sien Loopbahn wunnen. Na de Saison wull Borg en Uttiet vun veer Maanden nehmen, man he is blots noch bi dat Turneer in Monte Carlo, woneem he wahnt hett, antreden, woneem he bit in’t Veerdelfinale kamen is. As em denn vertellt worrn is, dat he bi tokamen Turneeren an de Qualifikatschoonsrunn deelnehmen müsse, wenn he wiel de Saison nich noog Turneeren speelt harr, hett Borg sien Loopbahn 1982 vörtietig opgeven. He weer 1983 noch eenmol in Monte Carlo an’n Start, geev kort dorna aver bekannt, dat he sik – in’t Öller vun 26 Johren – torüchtehn wull.

In de nächsten teihn Johren hett Borg en poor mol versöcht wedder na de Profitour torüchtokamen, harr dormit aver keen Spood. He weer in mehrere Turneeren al fröh utscheedt, un hett in Moskau 1993 denn gegen Alexander Wolkow verloren. Dorophen hett he sien Profiloopbahn vullstännig afbroken. Siet mehrere Johren is he as Speler op de Seniorentournee ünnerwegens.

Björn Borg is blangen Anja Pärson un Ingemar Stenmark de eenzige Sportler, de tweemol (1974, 1978) mit de renomeerten Svenska-Dagbladet-Goldmedaille uttekent worrn is.

Grand-Slam-Bilanz[ännern | Bornkood ännern]

  • French Open: Wunnen 1974, 1975, 1978 bit 1981 (Rekord tosamen mit Rafael Nadal)
  • Wimbledon: Wunnen 1976 bit 1980 (Rekordreeg blangen Roger Federer), Endspeel 1981
  • US-Open: Endspelen 1976, 1978, 1980 un 1981, 2-mol gegen Connors un 2 mol gegen McEnroe verloren
  • Masters: Wunnen 1979 un 1980, Endspeel 1975 un 1977

Speelstil[ännern | Bornkood ännern]

Borg hett sien Sporen in’t Tennisspeel torüchlaten, vunwegen dat he en ne’e Griep- un Slagttechnik wieter utklampstert hett. Bit dorhen weer dat begäng, den Släger för de Vörhand un Rüchhand gliek to hollen („Shake-Hand-Greep“). Man, Borg bruuk vör sien Vörhandslääg en annere Grieptechnik („Western“) as för de Rüchhandslääg („Eastern“). Er weer nich de eerste Speler mit en beidhännige Rüchhand, man he weer dordör in de Laag op de Rüchhandsiet vör allen verdeckt to slahn, so dat de Gegner nich so gau op sien Slag reageeren künn. Der al vun Rod Laver wieterentwickelte Top-Spin-Technik hett Borg wieter verbetert un mit en utermatige Präzision kombineert. Gegen sien kräftigen un utermatig akkeraten Top-Spin-Slääg harrn de Spelers mit de ollen Griep- un Slagtechnik tomeist keen Chance. De Nadeel vun den Top-Spin-Slag, neemlich de minnerte Ballsnelligkeit, weer dör sien hoge Präzision un sien grote Sekerheit mehr as utgleken. De graaden Slääg, de dormit mehr Snelligkeit un Druck harrn, harrn wegen jemehr streckten Flaagbahn ok de gröttere Gefohr in’t Nett hingen to blieven oder achter de Grundlien optokamen. Borg sien utermatige Stellung in’t Spitzen-Tennis baseer vör allen op disse Technik. Intwüschen is de Technik vun em to en Grundlaag vun’t moderne Tennis worrn un mutt in all Speelklassen beherrscht warrn.

Bekannt weer Borg aver ok för sien „Coolness“: Wenn he op’n Platz stünn hett man em keen Geföhlen anmarken künnt. Dorbi hebbt em ok Rüchstännen ahn Utsicht nich ut de Roh bröcht, jüst so wenig as Klamauk vun sien Gegenspelers oder Fehlers vun de Lienen- oder Schiedsrichters. In de engelschsprakigen Presse hett em dat den Ökelnaam „Ice-Borg“ inbröcht. Wenn he an’n Rand vun’t Verleren weer, hett he faken aver ok sien best Tennis speelt un Spelen noch ümdreiht, de al verloren utsegen. In sien Autobiografie hett he na sien Loopbahn den Grund för sien Roh angeven: In de Jöögd weer he na en baanige Benadeeligen moll so dull in Raasch kamen, dat he för en poor Maanden sparrt worrn is. Wenn en Schiedsrichter wat verkehrt maakt hett, hett em dat laterhen natürlich liekers opregt, man he harr sien Arger nich mehr na buten laten un wiest. Dat weer blots mööglich dör en düchtig Maat an Sülvstdisziplin.

To sien Roop hett ok en för de dormolige Tiet utermatige Fitness tellt. He weer jümmer vull dörtraineert, un ok sien Gegners wüssen kuum vun en Fall, dat se em mol an’t Sweeten oder ut de Pust beleevt harrn. Dorachter stünn en knakenhard Training mit sien langjohrigen Trainer Lennart Bergelin oder mit sien persönlichen Fründ Vitas Gerulaitis, de dormols sülvst ünner de besten teihn Spelers weer. Man kann seggen, dat Borg en nee’t Maat an Professchonalität in’t Tennis bröcht hett.

Influss[ännern | Bornkood ännern]

Dör sien Roop is Björn Borg to en sportlich Vörbild sünners för de sportlich intresserte Jöögd worrn, un dat nich blots för’n Tennis. Dör Borg geev dat en bannigen Toloop bi’n Tennissport. Vele, de förher nix mit Tennis antofangen wüssen, hebbt sik nu op eenmol för den Sport intresseert un en grote Tall vun Kinner hebbt anfungen, Tennis to lehren. Dat weer dorüm keen Wunner, wenn in de Tennis-Welt – anlehnt an de „Beatlemania“ – vun en „Borgmania“ snackt weer. Man kann dorüm Björn Borg den Verdeenst tospreken, dat he den Tennis to en wohren Bredensport maakt hett, de vördem mehr en Nischen-Sport weer.

Na sien Tennisloopbahn hett Borg sik as Gewarfsmann versöcht, man mit mehrere groot anleggte Weertschopsprojekten harr he an’t Enn nich so veel Spood, as he dat dacht harr. Ofschoonst sien Vermögen an’t Enn vun sien Loopbahn op ruchweg 80 Millionen US-Dollar taxeert weer, hett he 1996 Konkurs anmellen müsst. Över dissen weertschopplichen Daalslag is Borg intwüschen aver weg. In Sweden arbeit he vundaag mit Spood as Gewarfsmann.

Siet eenige Johren is Borg Naamsgever för en Kledaasch- un Parfum-Marke, de vör allen in Skandinavien verdreven warrt. 2004 hebbt de Kunnen ruchweg 70 Millionen Euro för Björn-Borg-Produkten utgeven. De Markenbesitter World Brand Marketing (WBM) is an’n 20. Dezember 2004 an de Börse Ne’e Markt vun Stockholm gahn.

Privatleven[ännern | Bornkood ännern]

Borg sien Leef in de Jöögd weer de Tennispelersche Helena Anliot, de later ok professional Tennis speelt hett. An’n 24. Juli 1980 hett Borg in Bukarest de rumäänsche Tennisspelerscher Mariana Simionescu heiraat. De Eh is 1984 wedder scheedt worrn. 1985 hett he dat Fotomodell Jannike Björling drapen, mit de he sien Söhn Robin (*1985) hett. Se sünd 1988 uteneen gahn. Twüschen 1989 un 1993 weer Borg mit de italieenschen Singersche Loredana Bertè verheiraat. Siet den 8. Juni 2002 is Borg mit Patricia Östfeldt verheiraat. Mit ehr hett he sien tweeten Söhn Leo (*2003).

Born[ännern | Bornkood ännern]

  1. ATP-Websteed

Weblenken[ännern | Bornkood ännern]

Commons-logo.svg Björn Borg. Mehr Biller, Videos oder Audiodateien to’t Thema gifft dat bi Wikimedia Commons.