Beermoderhals

Vun Wikipedia
Wesseln na: Navigatschoon, Söök
Schemaatsch Dorstellen vun de Beermoder (Uterus)

De Beermoderhals (in de Fackspraak Cervix uteri vun’t latiensch Femininum cervīx för „Hals“, „Nacken“ un Maskulinum uterus för „Beermoder“) is de ünnere Deel vun de Beermoder, de den Dörgang na da Vagina, den so nöömten Modermund, bargt.

De Beermoderhals stellt de Verbinnen vun de Beermoder un de Vagina dor. De Dörgang dortwüschen is mit en dicke Sliemhuut ümgeven, de ruchweg 3 cm wiet in dat Schedendack rinkiekt. De Dörgang is normalerwies drang, üm dat Opstiegen vun Krankmakers in de Beemoder to hinnern. Bi en Geboort warrt de Beermoderhals ünner den Influss vun dat Hormon Prostaglandin F2α weker. Wiel de Wehen geiht se apen un hett bi’t Dörgahn vun den Kopp vun’t Baby en Dörmeter vun mehr as 10 cm.

Anatomie[ännern | Bornkood ännern]

De butere Modermund
Hysteroskoopsche Ansicht vun’n Beermoderhalskanal

De Beermoderhals warrt ünnerdeelt in de Portio vaginalis uteri – de Deel, de in de Scheed rinkieken deit un mit Platenepithel afdeckt is – un den Beermoderhalskanal, de mit sliembilln Zylinderepithel utkleedt is. De Grenz twüschen de beiden Epithelorden ännert sik mit dat Öller un mit de Tall vun de Geboorten. Mit tonehmen Öller schufft sik de Grenz jümmer wieter na baven in den Kanal. De Form vun’n Modermund is vör de eersten Geboort noch rund un wiets sik na en Swangerschap normalerwies dweer splitt.

As Modermund (lat. ostium uteri) warrt de Dörgäng vun de Beermoder betekent, mit de de Zervixkanal na de Scheed hin (butere Modermund) oder na de Beermoderhöhl hin (binnere Modermund) apen geiht.

Butere Modermund[ännern | Bornkood ännern]

De butere Modermund (Ostium uteri externum) is bi en Nullopara – dat is de Beteken för en Fru, de noch keen Geboort harr – en rund Grübchen mit en korten dweerlopen Apen. Dat Ünnerscheden in en achtere un en vördere Modermundlipp maakt vör allen bi Fronslüüd Sinn, de al boren hebbt: Hier wiest sik de Apen as en dweerlopen Spleet. Bi en Orgasmus vun de Fro duukt de butere Modermund peristaltisch in dat Sperma in, üm dat Wieterleiden vun den Samen in de Tuben to ünnerstütten.

Binnere Modermund[ännern | Bornkood ännern]

De binnere Modermund (Ostium uteri internum) warrrt ok as „Isthmusdrang“ betekent un stellt dat binnere Enn vun den Beermoderkanal dor. Vun Bedüden is de binnere Modermund in den Fall, bi de de Plazenta wiel en Swangerschop as Placenta praevia totalis den Utgang vullstännig bedecken deit un dormit en Hinnern bi de Geboort dorstellt.

Swangerschop[ännern | Bornkood ännern]

Wiel en Swangerschop warrt bi jede Vörsorgünnersöken de Läng vun’n Beermoderhals utmeten. Bit to de Geboort schüll de Läng grötter as 25 cm wesen. Wenn de körter is, kann en Zervixinsuffizienz vörkamen, also en Swäck vun’n Modermund mit der Gefohr, dat de sik vör de Tiet utwieten deit. Dat Verkörten vun’n Beermoderhals bargt de Gefohr vun en Fröhgeboort, un de Modermund kann ahn Wehen apengahn. Dat is en Oorsaak ok för wedderholte Laataborten un Fröhgeboorten.

Wenn dat Verkörten rechttietig opdeckt warrt, kann dör en Ümslingen vun Beermoderhals mit en Faden („Shirodkar- oder McDonald-Cerclage“) oder en vullstännigen Modermundversluss versöcht warrn de Duer vun de Swangerschop to verlängern. Man, disse Methoden sünd ümstreden. Eher is bi en wietere Swangerschop na’t vörttietige Enn vun de Swangeschop dorvör an en vörsorgliche Behanneln in Form vun en Modermundversluss dör Operatschoon (Cerclage) to denken. Dat gifft Henwiesen darop, dat dat Risiko vun en Fröhgeboort dör en duersome Gaav vun Gestagenen sieter maakt warrn kann[1].

Zervixsliem[ännern | Bornkood ännern]

Tagen Zervixsliem, de Fadens tütt

De Beermoderhals gifft en Sliem af, de sik in’n Verloop vun’n Zyklus op tyypsche Oort ännert:

An de nich fruchtboren Daag is de Slieem taag bit backig un vun en pappige Kunsistenz. He verslutt denn as natürlich Hinnern den Modermund. Ünner’t Mikroskop sütt man de Muzinfadens dörenanner liggen, so dat Bakterien oder Spermien nich dördringen künnt.

An de Daag üm den Eisprung warrt de Sliem dorgegen dünnfletig, glaskloor un tütt Fadens. De Muzinfadens sünd nu parallel utricht un geevt Verlööf, dat Spermien in de Beermoder opstiegen doot. Dat Verhöden mit de so nöömten Minipill baseert ünner annern ok op de Wirken vun de Gestagenen op den Zervixsliem. Spermien künnt dor denn nich mehr so goot dör.

De Zervixsliem billt den Sliemproppen vun’n Beermoderhalskanal un warrt vun de Zevixdrüsen afsünnert. Dat is en licht alkalisch Sekret, dat nich blots sien Kunsistenz man ok de Menge in’n Verloop vun den Menstruatschoonszyklus ännert. De Sliem sett sik ünner annern ut Muzinen, Aminosüren, Zuckers, Enzymen, Elektrolyten un (bit to 90 %) Water tosamen. Dien Funkschoon is to Hinnern, dat Krankmakers un Spermien an de nich fruchtboren Daag in de Beermoder indringen künnt.

Ünner den Influss vun Östrogenen warrt de Sliem so dünn, dat he sik to en Faden uttehn lett un spinnbor warrt. De Spinnborkeit is kort vör den Eisprung an’n gröttsten. Denn is de Dördringborkeit vun den Sliem an’n gröttsten un dat Farnkruutphänomen (kiek ünnen) positiv. In de tweeten Hälft vun den Menstruatschoonszyklus warrt ünner Influss vun’t Gestagen de Produkschoon minnert un de Sliem tütt keen Fadens mehr. Dat Farnkruutphänomen is nu negativ un de Spermien künnt blots noch slecht oder gor nich mehr dör den Sliem dördringen.

De Ünnerscheden vun de Sliemgööd warrt bi de symptothermalen un bi de Billings-Methood to’n Bestimmen vun de fruchtboren un de nich-Fruchtboren Daag utnütt.

Farnkruutphänomen[ännern | Bornkood ännern]

Dat Farnkruutphänomen is en bannig tyypsch Billn vun farnkruutlieke NaCl-Kristallen in drögen Zervixsliem, de ünner Influss vun Östrogen tostannen kummt. Sünners düütlich kummt dat kort för den Eisprung vör, geiht ünner den Influss vun Progesteron in de tweeten Zyklushalf aver wedder weg.

Krankheiten[ännern | Bornkood ännern]

Schadens in’n Epithel an de Böverflach vun’n Modermund (Erosio vera), Sehren vun den Beermoderhals (Zervizitis), Beermoderhalspolypen, Blöden, Reten in’n Modermund oder annere unnormale Ännern künnt dör en Kolposkopie faststellt warrn. Wenn en Befund nich eendüdig harmlos is, warrt in de Regel en Afstreekzytologie maakt oder Geweev rutnahmen.

En Lazeratschoonsektropium entsteiht na’t Inrieten vun’n Modermund wiel en Geboort mit nafolgen Narvenbilln bi’t Heelen un Vörwölben vun de Modermundlippen.

To’n Fröhopdecken vun’n Beermoderhalskrebs (Zervixkarzinom) schall al twölf Maanden in richtig dörföhrten zytoloogschen Afstreek to’n Farven na Papanicolaou in en dorop spezialiseert Labor schickt warrn. Bi unklore Befunnen oder swore Zellatypien as ok bi en Carcinoma in situ warrt en Konisatschoon anslaten, dat es en kegelförmig Rutnehmen vun Geweev.

Borns[ännern | Bornkood ännern]

  1. Artikel im New England Journal of Medicine

Weblenken[ännern | Bornkood ännern]