Banana Growers Association
In de Banana Growers Association (BGA) sünd de Bananenplanters von Belize tohoopslaten. Dor höört 22 Plantaaschen to.
De 22 Bananen-Farmen mit üm un bi 2630 Hektar Land doot all in’n Süden von Distrikt Stann Creek un in’n Noorden von’n Distrikt Toledo liggen.[1] Twölv Dörper sünd von’n Bananenanbo präägt: Santa Cruz, San Roman, Santa Rosa, Georgetown, San Pablo, Cowpen, San Juan, Bella Vista, Esperanza, San Isidro, Trio un Bladen.[1] In düsse Dörper arbeidt üm un bi 3500 Arbeiders op de Plantaaschen.[1]
De BGA köfft de Bananen von de Plantaaschen op un övernimmt den Export. De Bananen warrt meist all an dat Ünnernehmen Fyffes wiederverköfft un kaamt in Grootbritannien op’n Markt. Stand 2017 hebbt Bananen 14 % von de Exporten von dat Land Belize utmaakt un weren dormit en wichtigen Faktor för de Weertschop von Belize.
Historie[ännern | Bornkood ännern]
De eersten Bananenplantaaschen sünd von brietsche un US-amerikaansche Investoren an’t Enn von dat 19. Johrhunnert in Belize anleggt worrn.[2] De Bananen sünd toeerst vör allen na New Orleans exporteert worrn.[2] In de Johren 1920 is de Industrie aver tohoopbraken, nadem in Belize de Panamakrankheit utbraken is.[2]
In de Johren 1960 sünd de Plantaaschen denn wedder utboot worrn, aver de Tropenstorm Nr. 18 in dat Johr 1975 un de Hurrikan Greta-Olivia 1978 hebbt de Farmen swoor tosett.[2] Von 1971 bet 1985 hett dat staatlich kuntrulleerte Banana Control Board (BCB) de Industrie managt. In de Johren 1970 hebbt sik de Arbeiders ok in de Democratic Independent Union un de Southern Christian Union gewerkschaftlich organiseert.
1985 is dat BCB oplööst worrn, nadem dat 9 Milljonen US-Dollar Schüllen tohoopsammelt harr.[2] De 880 Hektar Land von dat Banana Control Board sünd an private Investoren verköfft worrn.[2] Bet 1990 weer dat Anborebeed op 2400 Hektar wussen un dat BCB is wedder nee inricht worrn.[2] 1991 hett dat Banana Control Board sien Opgaven an de ne’e Banana Growers Association afgeven.[2]
Bet 1990 sünd de Bananen över den Haven von Puerto Cortés in Honduras exporteert worrn.[2] 1990 is denn de Haven von Big Creek trech worrn.[2] Sietdem is dat de Exporthaven för de Bananen.[2]
Footnoten[ännern | Bornkood ännern]
- ↑ a b c The Banana Belt, The South of Belize, our home, www.belizebananas.com
- ↑ a b c d e f g h i j k Tim Merrill: Belize: A Country Study. 1992: Bananas.
Weblenken[ännern | Bornkood ännern]
- Websteed von de Banana Growers Association (engelsch)