Azaleen

Vun Wikipedia
Wesseln na: Navigatschoon, Söök
Stuvenazalee (bleiht in’n Dezember)

Azaleen weert allerhand Aarden un Sorten ut dat Geslecht vun de Rode Dendern nömmt. Dor hannelt sik dat um Strüker bi, de ehr Loof afsmieten doot oder de mit ehre lüttjen Blöer jummers gröön blievt.

Stuvenazaleen[ännern | Bornkood ännern]

Rhododendron-Simsii-Hybride

An un for sik kaamt de beiden Arden, de as Stuvenazaleen anboot weert, ut Japan un China. In Europa möögt se sunnerlich de „Indische Azalee“ (Rhododendron simsii) as Stuvenplant hebben, man ok de „Japaansche Azalee“ (Rhododendron japonicum) hoolt se sik nich veel minner in’t Huus. De Stuvenazaleen mischt ehre Gene oorntlich dör’nanner (se sund heterozygot). So seht de Aflamen faken ganz anners ut, as de Vorwesers. Vundeswegen weert se in de Produktschoon blot vegetativ vermehrt (dör Paten). Anners geev dat bi’t Utseihn vun en Aart hunnerte vun Variatschonen. De enkelten Sorten könnt so blot man vegetativ bi’nanner holen weern. Nadem se Wuddeln ansett hefft, weert de Paten in’n Pott plant’ un runner sneden, dormit se allerhand Twiege towege bringt. Meist weert se in’n Summer buten oder unner Folie tagen. Ehr dat in’e Nacht freren deit, mütt de Pött denn in en Drievhuus mit Böttaven. Dor weert se kull, man sunner Frost wieter pleegt. Je na Soort weert se denn to unnerscheedliche Tied to’n „Drieven“ in warmere Drievhüser stellt. Later weert se in Spezial-Goornbobedrieve uptagen, bit se Knuppen ansett.

Tohuse in’e Stuven bruukt de Azaleen en Stuve, de na Mööglichkeit kull is. Je kuller, um so duller un länger bleiht se. Wichtig is ok, dat se nich heel un deel utdrögen doot.

Vun Rhododendron simsii sünd en poor Hunnert Sorten tücht wurrn, bi Rhododendron japonica sünd de Goorners mit de Tucht nich ganz so flietig ween. To dat Sortimeng, wat normolerwiese in Goornbobedrieve anboot warrt, höört avers man keen 50 Sorten.

De Stuvenazaleen bleiht vun September bit April mit eenfache un füllte Blöten in allerhand Sorten vun Witt, Rosa un Root.

Goornazaleen[ännern | Bornkood ännern]

Azalee

As Goornazaleen weert sunnerlich de Arden Rhododendron molle un Rhododendron flavum (vörmols Azalea pontica) bruukt. Blot de Rode-Dendern-Arden, de in’n Winter ehre Blöer afsmieten doot, weert Goornazaleen nömmt, de annern heet Rode Dendern.

De Goornazaleen bleiht vun Mai bit Anfang Juni, de beiden Arden, de boven nömmt wurrn sünd, in allerhand Sorten vun Geel un Orange. Rhododendron flavum hett in’n Harvst schöne bunte Blöer.

Arden[ännern | Bornkood ännern]

Kiek ok bi[ännern | Bornkood ännern]

Weblenken[ännern | Bornkood ännern]