Australopithecina

Vun Wikipedia
Wesseln na: Navigatschoon, Söök

De Australopithecina (na den Sinn kann dat mit „Vörminschen“ översett weern) sünd en utstorvene Grupp mank de Hominini un höört to de Familie vun de Minschenapen (Hominidae). To düsse Grupp höört de Geslechter Ardipithecus un Australopithecus to. Wenn de so nömmten stebigen Australopithecus-Aarden to en egen Geslecht afspleten weert, denn mutt ok dat Geslecht Paranthropus dor mit torekent weern. Streden warrt mank de Paläologen üm Kenyanthropus platyops. Schall he as eenzigste Aart to en egen Geslecht rekent weern, oder is he en egene Aart mank dat Geslecht Australopithecus? Ok nich ganz klaar is, of Sahelanthropus un Orrorin vun ehr Gestalt her to den Ardipithecus tohören doot. Mööglicherwiese könnt se, wenn noch en paar Fundstücken mehr dorto kamen sünd, all to datsülvige Geslecht rekent weern.[1]

De Australopithecina sünd vör um un bi 7 Mio. Johren upkamen un hefft leevt bit vör um un bi 2 Mio. Johren. Veel vun de Aarden, de to düsse Grupp rekent weert, hefft in düsse lange Tied dat Liekuplopen lehrt. Vun de Australopithecina stammt ok de eersten Vertreders vun dat Geslecht Homo af. Dat sünd de Homo rudolfensis un de Homo habilis. Man twuschen de Forschers gifft dat noch keen Eenigkeit, of de Homo habilis to dat Geslecht vun de Minschen rekent weer kann, oder of he nich doch ehr na de Australopithecina henhöört.

Ut de Historie[ännern | Bornkood ännern]

Dat is noch gor nich lang her, dor sünd bloß de Minschen as Hominidae ankeken wurrn. De Minschenapen weern dormols Pongidae nömmt un vun de Hominiden afsett. So sünd beide Gruppen dormols as twee Familien ansehn wurrn, de vun'anner scheedt sünd. Hüdigendags weert Minschenapen un Minschen in de Familie Minschenapen (Hominidae) tohopenfaat.

Belegen[ännern | Bornkood ännern]

  1. Yohannes Haile-Selassie, Gen Suwa, Tim White: Late Miocene Teeth from Middle Awash, Ethopia, and early hominid dental evolution. Science 303, S. 1503-1505, 2004