Atomphysik

Vun Wikipedia
Wesseln na: Navigatschoon, Söök

De Atomphysik is dat Deelrebeet vun de Physik, dat sik mit den Opbo vun de Atomen ut Atomkarn un Elektronenhüll befaat. Se ünnersocht bito ok de Wesselwirken vun de Atomen oder ok Ionen mit annere Atomen, mit Fastkörpers, mit Licht un mit magnetsch oder elektrisch Feller. Se beschrifft ok de beobachten Spektrallienen vun de Atomen, indem se de Verdeelen vun de Elektronen op de quantenmechanschen Energiestopen ünnersocht, un befaat sik mit den Opbo vun dat Periodensystem un de Grundlagen für dat Verstahn vun cheemsch Binnen.

De Atomphysik warrt faken mit de Karnphysik verwesselt, de sik aver mit de Struktur un den Opbo blots vun den Atomkarn beschäftigt. So warrt ok in’n dagdääglich Spraakbruuk vun Atomenergie, Atomkraftwark oder Atombomb snackt, wo dat egentlich üm de Karnphysik geiht.

De Annahm, dat all de Materie ut lüttste Deelken, de Atomen, tohopensett sünd, geev dat al in de Antike be de Naturphilosophen vun de Greken. Dör Experimenten stütt weer dat aver eerst in’n 19. Johrhunnert mit de Ünnersöken von John Dalton, Joseph Louis Gay-Lussac un Ludwig Boltzmann. As de Spektroskopie opkeem, weer denn ok na de Struktur binnen in dat Atom fraagt un na jümmer Dynamik. Dat hett denn wieterföhrt to de Quantenmechanik, wiel de klass’sche Physik dorför nich mehr utreken de.

In de modernen Atomphysik befaat sik de Wetenschopplers mit prick Meten vun atomare Energiegrötten, worut sik Naturkonstanten nipp un nau bestimmen laat un fundamentaal Theorien proovt waart. Ünnersöken an exotsch Atomen deent dorto, Fragen ut de Karn- und Elemenardeelkenphysik mit Methoden ut de Atomphysik antogahn. Ultrakotte Lichtpulse schöölt de dynamschen Vörgäng in de Elektronenhüll apenbor maken. In Ionenfallen künnt enkelte ioniseerte Atomen över längere Tietrüüm infungen un mit groote Nauigkeit ünnersocht warrn. Vundaag sünd dör de Laserköhlen un dör de magneto-optischen Fall ok Ünnersöken an ultrakole Gasen un Bose-Einstein-Kondensaaten un sogor an bannig rore Isotopen möglich worrn

En grote Tall vun Anwennen sünd dör de Atomphysik schapt woorn, so as de Laser oder de Atomklock. Methoden, de an’n Anfang för atomphysikalsch Experimenten utdacht weern, hebbt hüüt faken en wiet grötter Bedüden un Anwennen funnen. T. B. de Karnspinresonanz to’n apenbormaken in de Medizin, de Absorptschoons- un Emissionsspektroskopie in de cheemschen Analytik oder de Fotoelektronenspektroskopie bi’n Utforschen vun Materialen in de Materialwetenschap.