Aikidō Toho Iai

Aikidō Toho Iaidō (auch AikiToho Iai oder Nishio Ryu) is en Oort vun de japaansche Kampkunst Iaido un kummt vun de Kunst vun de Kamp mit de Sweert vun de Samurai in’t ole Japan. De Naam sett sik tosammen ut de japaanschen Wörr 合 ai „Harmonie“, 氣 ki „Energie vun dat Leven“, toho „Schweerttechnik“, 居合 iai „trecken“ un 道 dō „Weg vun dat Leven“.

Anners as in dat Kendō geiht dat in dat Iaido nich dorüm, in Wettstrieden gegenenanner to kämpen un so beter to warrn, man dat gifft Katas, de een löppt un mit de een lehrt, dat Sweert to föhren un in den Vergliek mit sik sülven beter to warrn. Dat Besünnere in dat Iaidō is, dat een dat Sweert so gau treckt, dat een dor glieks mit snieden kann. Bi dat Iaido gifft dat vele verschedene Scholen, vunwegen dat verschedene Meesters geven hett, de all en beten wat anners maakt hebbt un all goot begrünnt hebbt, wat se daan hebbt, sodat vundaag keeneen seggen kann, dat dat Ene verkehrt is. Fröher weer dat so, vunwegen dat verschedene Familien geev, de mit Sweertern kämpen kunnen un de Samurai utbillt hebben.

In dat Aiki Toho Iaido (een vun de Iaidowiesen) gifft dat föffteihn Katas (Regen vun Bewegen de vörschreven sünd), de bi de Prövens pröövt warrt un noch en paar ole Katas, de een bloot so to den Pläseer lopen kann. Düsse Katas wöör in de Tiet üm un bi 1960 vun Shōji Nishio tosammen stellt un gaht op en paar Aikidotechniken torüch, wiel dat he sik dacht hett, dat he ok öven will, wenn he dor graad keen Uke (Partner de angriepen deit) för hett un wiel dat he dacht hett, dat een keen Aikidō maken kann, wenn he dor nich de Arbeit mit de Wapen to versteiht.

Bi dat Öven driggt een en Antog ut en Gi, en Jack, en Büx, en Gördel un dorto en Hakama, en traditschoonel japaansche, lange Büxenrock, in en düüstern Klöör, mehrst düüsterblau oder swatt. Wenn een al heel lang en Meester is, kann een ok en helleren Klöör as to’n Bispill gries dregen. Normalerwies is een bi dat Öven in dat Dojo, en Sporthall un dor gifft dat en paar Regeln för dat Bedregen.

De Wapen sünd na Vörbild vun de licht bagene, japaansche Sweert, de Katana, maakt. Dat gifft dat Bokken oder Bokutō, en Holtsweert, dat Iaitō, en stuuf Metallsweert, dat faken en Iesen-Tink-Mischmetall an de Lemmel hett un dat Shinken, en scharp Metallsweert. Dat Bokken is dat mit dat een anfangen deit un wenn een al wat beter is, denn dörv een mit en Iaito öven, man bit dat een en Shinken verwennen dörv, duert dat böös lang un brukt bannig veel Öven. Neven de Sweertern gifft dat noch den Jō, en lang Holtstock, as Wapen.

Literatur

• Michael Russ: Aikido Toho Iai. Aikido und Schwertkunst. Meyer & Meyer Verlag, Aachen 2006, ISBN 3-89899-136-9.