Zampel

Vun Wikipedia

En Zampel, Zampelbüdel oder Zampeltasch is de plattdüütsche Naam för en Büdel oder lüttjen Sack ut Linnen, as de Habenarbeiders em fröher över de Schuller nahmen hefft. Dat Woort kummt vun dat engelsche Woort „sample“ („Proov“) vun her. In Bremerhaben, Bremen un Hamborg arbeiden de Schauerlüde un Habenarbeiders in’n Freehaben. De Göder, wo se dor mit to doon harrn, mössen vertollt weern, wenn se ut’n Haben na de Stadt rutbröcht weern. Sunnerlich vun Tabak, Koffi un Rum hefft se denn avers geern wat bisiet nahmen un in ehren Büdel mit na buten smuggelt. Wenn dat nich toveel weer, hefft de Tollbeamten en Oog toknepen, man wenn dat toveel weer, geev dat Verdreet. Up jeden Fall versöchen de Habenarbeiders dat mit de Utreed, dor hannel sik dat nich um Smuggelgoot bi, man bloß um en „sample“ („Proov“), un dor weer ja woll nix gegen in to wennen.

Düsse Zampel is avers nich bloß to’n Smuggel bruukt wurrn, an un for sik weer dor dat Warktüüch in, un allens, wat de Lüde so bruken döen: „Lang man her - kümmt allens in'n Zampel rin.“