Yucatán (Halvinsel)
Yucatán oder Yukatan is en Halvinsel in Middelamerika, de den Golf von Mexiko un den Golf von Honduras (Karibische See) vonenanner afdeelt.
Op de Halvinsel doot de Staat Belize, dat Departamento Petén von Guatemala un de dree Bundsstaten Campeche, Yucatán un Quintana Roo von Mexiko liggen.
Vör de Oostküst liggt dat Eiland Cozumel un dat Mayariff.
Historie
[ännern | Bornkood ännern]Bevör de Europäers na Amerika kamen sünd, weer de Halvinsel en Zentrum von de Maya-Hoochkultur, de ünner annern de Städer Chichén Itzá, Uxmal, Tulum un Edzná grünnt hebbt.
De eerste Europäers in Yucatán weren 1517 Francisco Hernández de Córdoba un 1518 Juan de Grijalva. Von 1527 af an hett denn Francisco de Montejo anfungen, dat Rebeed för Spanien militärsch intonehmen. 1547 weer ganz Yucatán ünner spaansche Kuntrull. Dat Rebeed hett lange Tied to dat Viezkönigriek Neespanien tohöört. 1821 is Mexiko as Kaiserriek Mexiko unafhängig worrn un Yucatán hett dor mit tohöört. Dat Kaiserriek hett aver blots bet 1823 bestahn. As sik in dat Johr de Republik Mexiko billt hett, hett sik de Republik Yucatán utropen un weer en Tied lang unafhängig. Aver noch in dat sülve Johr hett sik de Republik Yucatán an de Republik Mexiko anslaten. 1841 hett sik de Republik noch wedder för unafhängig verkloort, is aver na mexikaansche Togeständnisse 1843 wedder Deel von Mexiko worrn. Nadem sik Mexiko nich an siene Togeständnisse hollen hett, is de Republik von 1846 bet 1848 noch wedder unafhängig ween. Nadem 1847 de Kastenkrieg utbraken is, in den sik de inheemschen Mayas gegen de Herrschop von de Mestizen to Wehr sett hebbt, is de Republik Yucatán freewillig wedder Deel von Mexiko worrn, üm betere Help gegen de Mayas to kriegen. De Kastenkrieg hett sik bet 1901 hentagen, as de Zentraalregerung von Mexiko de letzten Rebeden in Yucatán wedder von de Mayas innahmen hett.
Bet 1857 weer de ganze mexikaansche Deel von de Halvinsel Deel von’n Bundsstaat Yucatán. In dat Johr is de Westen as Bundsstaat Campeche egenstännig worrn. 1902 is de Oosten von’n Bundsstaat Yucatán ünner de Verwaltung von de Zentraalregerung stellt worrn. Düt Territorium hett eerst 1974 den Status von en Bundsstaat kregen.
Weblenken
[ännern | Bornkood ännern]
Yucatán (Halvinsel). Mehr Biller, Videos oder Audiodateien to’t Thema gifft dat bi Wikimedia Commons.
Koordinaten:18° 51′ N, 89° 8′ W