Xenomorph

Vun Wikipedia
In dissen Granodiorit is de Quarz (dörsichtig-grau) xenomorph. Dat Witte is Feldspat, dat Swarte sünd mafisch Mineralen.

Xenomorph (gr. xénos „frömdordig“, morphé „Gestalt“) warrt in de Eerdwetenschoppen un sünners in de Mineralogie seggt, üm Mineralen to beschrieven, de nich in jemehr kristallograafsch vörgeven Egengestalt vörliggen doot. En gliekdüdend Begreep is allotriomorph.

En xenomorph Mineral wiest nich de för dat Mineral tyypsche Geometrie op un hett ok keen utprägte Kristallflachen. Se kamt tostannen, wenn dat Wassdom vun’t Mineral inschränkt is, also wenn nich noog Ruum is, dat sik de Kristallen ahn Stören utbreden künnt. So wat passeert t. B. wenn en Steensmölt (Magma) verklamt un dorbi to glieken Tiet mehrere verschedene Mineralen wassen doot. De stört sik denn gegensietig bi’t Wassen un künnt dorüm jemehr egen Gestalt nich utbilln.

Dat Gegendeel vun xenomorph warrt as idiomorph betekent, wenn also de Egengestalt vullkamen urprägt is. Is de Egengestalt blots to’n Deel utbillt, snackt man vun hypidiomorph.