Wilken

Dit Woort hett noch annere Bedüden: kiek dorför ünner Wilken (Familiennaam).

Wilken (ok Willken oder Wilcken un Wilke) is een plattdüütschen Vörnaam for Jungs.

Herkamen

Wilken kummt vun den düütschen un vörmals germaanschen Naamen Wilhelm. Dor steekt de beiden Wöör Willio (dat heet Will) un Helm (dat heet Helm oder Schutz) in. De eerste bekannte Mann, de düssen Naamen dregen dö, weer de Hillige Wilhelm vun Aquitanien (745 bit 812). Vunwegen de Familien Oranien un Hohenzollern düssen Naamen dregen döen, weer de Naam in den Nordwesten vun Europa begäng.

De plattdüütsche Naam

As dat bi de Plattdüütschen begäng weer, hefft se düssen Naamen afkört un dor Willi vun maakt. Dat weer de korte Form. De warrt ok hüdigendags noch bruukt. As dor een Smusenaam fort lüttje Jungs vun maakt weern scholl, keem dor dat Anbacksel (Suffix) to'n lüttjer maken (Diminutiv) -ke achteran. Denn heet de Naam Willeken. Dat bedutt soveel, as Lüttje Willi. Mit de Tiet is düsse Naam afslepen to Wilken.

Fundöörd

In ole Naamslisten un Urkunnen finnt sik düsse Naam toeerst

• 1459 in Bremen
• 1680 in Seehusen bi Bremen
• 1698 in Ganderkesee
• 1713 in Seehusen bi Bremen
• 1780 in Seehusen bi Bremen
• 1812 in Seehusen bi Bremen

Tonaams

Vun düssen plattdüütschen Vörnaam Wilken kaamt ok de plattdüütschen Tonaams Wilken un Wilcken oder ok Willken un Wilkens her. De bedüüt so veel as: De ut Wilken sien Familie kummt.

Bekannte Lüüd mit düssen Vörnaam

• Wilken von Alten, düütschen Kunsthistoriker,
• Wilken Bolen, düütschen Kanoniker,
• Wilken F. Dincklage, düütschen Musiker un Schauspeler.

Kiek ok nah bi

• List vun plattdüütsche Vörnaams

Weblenken

• Wofaken un woneem de Vörnaam in Düütschland vörkummt: Wilken, Willken, Wilcken, Wilke