Willem Ludwig vun Nassau-Dillenborg

Vun Wikipedia

Willem Ludwig vun Nassau-Dillenborg (*13. März 1560 in Dillenborg in Hessen;† 13. Juli 1620 in Ljouwert in de Provinz Freesland) weer Greve vun Nassau un Statthöller vun de Provinz Freesland in de Nedderlannen.

Leven[ännern | Bornkood ännern]

Willem Ludwig is in Dillenborg boren as de eerste Söhn vun Jan VI. vun Nassau. Bit 1577 leev he in Düütschland, denn keem he mit sien Vadder na de Nedderlannen. 1579 weer he Oberst in de nedderlannsche Armee. As Renneberch sik 1580 mit de Provinz Grunneng up de Spaniers ehr Siet stellen dö, is Willem Ludwig em 1584 as Stattholler eerst vun de Provinz Freesland un later ok vun dat Grunnengerland, Drenthe un Oaveriessel folgt. Vun 1580 af an bit 1594 hett he Krieg föhrt gegen Spanien, wat dormols grote Delen vun de Nedderlannen besetten dö.

Willem Ludwig weer en Reformer, de nich blot de Armee beter upstellen dö, man ok Infloot utöven dö up dat ganze Tosamenleven. He hett sik ok för de Sake vun de Protestanten stark maakt un dor för sorgt, dat de Länner, de he regeern dö, reformeert wurrn sünd. He hett ok de Universität vun Franeker un de Universität vun Grunneng grünnt.

An'n 25. November 1587 heiraat he Anna vun Nassau. Dat weer Willem vun Oranien siene Dochter. Man se is noch nich mol een Johr later storven. Na den Dood vun sien Vadder is he 1607 Greve vun Nassau wurrn. Vunwegen dat he süms keen Kinner harrt hett, is de Titel na sien Dood up sien Broder övergahn. Dat weer Georg vun Nassau-Dietz. Sien annern Broder Ernst Kasimir vun Nassau-Dietz is em folgt as Stattholler in de Provinz Freesland.

Ökelnaam[ännern | Bornkood ännern]

In Freesland hett he den Ökelnaam Us Heit kregen. Dat heet up Platt: Use Vadder. Willem Ludwig, Greve vun Nassau, Stattholler vun Freesland un Grunneng.