Willehad-Kapell

De Willehad-Kapell weer bet 2011 en röömsch-kathoolsche Kapell in Cuxhoben an de Grodener Schossee 21 in dat Dekanat Bremerhoben von dat Bisdom Hilmssen. Ehren Naam hett se von’n Hilligen Willehad. Vondaag höört dat Rebeed von de Willehad-Kapell to de Karkengemeen von de Marienkark in Cuxhoben.

1955 hett de Karkengemeen von de Hart-Jesu-Kark dat Meyn’sche Huus in de Grodener Schossee köfft. 1956 hebbt se in dat böverste Stockwark von de Schüün, de op dat Grundstück steiht un 1892 boot worrn is, de Willehad-Kapell inricht. De Kapell weer eerst man lütt. 1961 hebbt se denn in dat Meyn’sche Huus en ne’e, wat gröttere Kapell inricht. 1967 hebbt se denn wedder ümboot un nu is de ganze Schüün as Kapell inricht worrn. An’n 25. August 1967 is se wieht worrn. De Kapell harr nu üm un bi 100 Plätz. Vör allen ok för de kathoolschen Gastarbeiders ut Spanien un Portugal weer de Kapell dor. In de Gebüden weren von 1958 af an ok en Kinnergoorn, von 1967 af an dat Spaansche Zentrum un en Twieg von de Caritas ünnerbröcht.

De Kark is an’n 1. Oktober 2011 dör den Preester von de Marienkark, Christian Piegenschke, profaneert worrn. De spaansche Öllernvereen (Asociacion de Padres de Familia de Cuxhaven y Alrededores e.V.), de ok dat spaansche Zentrum bedrifft, schull de Rüüm von de Kapell denn för sik mit bruken.

De Kinnergoorn harr al 1986 en egen Gebüüd kregen (von 1987 af an as Kita) un is ok na 2011 bleven.

De nächste Kark is nu de Marienkark, de so bi twee Kilometer weg is von de fröhere Willehad-Kapell.