Wilhelm Varenhorst

Wilhelm August Otto Varenhorst (* 21. Mai 1865 in Försnau; † 5. September 1944) weer en düütschen Jurist un Politiker.

Varenhorst is 1865 in Försnau boren. He weer dor ok op de Volksschool un denn op dat Gymnasium Ossenbrügge. Von 1885 bet 1889 hett he Juristeree an de Universitäten Jena un Berlin studeert. As Student is he 1886 Maat von de Burschenschaft Arminia auf dem Burgkeller in Jena worrn. Na dat Studium is he in’n prüüßschen Justizdeenst gahn un weer Referendar un denn von 1894 af an Gerichtsassesser. An’n 1. Januar 1900 is he as Amtsrichter an dat Amtsgericht Töst versett worrn un dor bet 1930 bleven.

Varenhorst weer ok Maat von’n Kreisutschuss von’n Kreis Horborg, Oberleutnant von de Landwehr-Feldartillerie un is mit de Landwehr-Deenstutteeknung II. Klass uttekent worrn. Von 1900 bet 1922 un von 1924 bet 1931 weer he Vörsitter von’n landweertschoplichen Vereen Töst. 1906 hett he en Schrift över Ländliche Rechtsfragen rutbröcht un ok ans en Reeg Opsätz för jagd- un landweertschopliche Tiedschriften schreven.

Bi de Wahl 1907 to’n Rieksdag is Varenhorst in’n Wahlkreis Hannover 17 (Horborg, Rodenborg, Zeven) in’n tweten Wahlgang mit 57,15 % von de Stimmen wählt worrn un weer denn bet to de nächste Wahl 1912 Afornten för de Düütsche Riekspartei. Bi de Wahl 1908 to dat prüüßsche Aforntenhuus hett he in’n Wahlkreis Stood 6 (Rodenborg, Veern, Zeven) 87,2 % von de Stimmen kregen un weer dor Afornten för de Freekunservative Partei. Bi de Wahl 1913 hett he in’n sülven Wahlkreis 66,5 % von de Stimmen kregen un weer denn bet an dat Enn von de Legislaturperiood 1918 Afornten.

As Afornten hett he sik ünner annern för de Bueree un Vagelschuul insett.