Wilhelm Hastedt

Friedrich Heinrich Wilhelm Hastedt (* 24. August 1835 in Horborg; † 12. September 1904 ok dor) weer en düütschen Politiker.

Hastedt is 1835 in Horborg boren un weer op de Realschool in Lümborg. In Horborg hett he 1867 en Broeree grünnt. De Beerkeller, de von de Broeree Hastedt in de Buxthuer Straat 35 in’n Hang von Swartenbarg rin boot worrn is, besteiht noch vondaag.

Hastedt is 1871 Börgervörsteher worrn un 1873 Senater. 1887 hett he Good Wensin köfft, üm dor sülvs Brogassen antoboon. De Besitter vörher, Johannes Schwerdtfeger, is bet 1892 Pächter bleven. An’n 1. Mai 1892 hett Hastedt sülvs anfungen, dat Good to bewirtschaften.

Von 1882 bet 1885 weer Hastedt Afornten för den Wahlkreis Hannover 29 (Horborg) in dat Prüüßsche Aforntenhuus. 1887 bet 1893 weer he Afornten för den Wahlkreis Hannover 17 (Horborg, Rodenborg, Zeven) in’n Düütschen Rieksdag. He weer in de Natschonalliberale Partei.

Hastedt is 1904 in Horborg doodbleven un dor op’n Olen Karkhoff begraven. In Horborg sünd de Hastedtplatz un de Hastedtstraat na em nöömt worrn.