Wikipedia:Spraak för de Artikels

Düsse Sied is ene Richtlien vun de plattdüütsche Wikipedia

Düsse Richtlien is ene Övereenkumst, de alle, de an de plattdüütsche Wikipedia mitarbeidt, as Richtsnoor bruken schöölt.

Kort:WP:SPRAAK

De Richtlien Spraak för de Artikels leggt den Ümgang mit den Ümgang verscheden Dialekten vun’t Plattdüütsche hier in de Wikipedia fast.

Wat för Dialekten ümfaat de plattdüütsche Wikipedia?

Plattdüütsch is ene Spraak oder Dialektgrupp, de vun de Nedderlannen bet an de düütsch-poolsche Grenz langt un in fröhere Tieden ook bet na Oostpreußen snackt wurr.

In de plattdüütsche Wikipedia sünd alle plattdüütschen Dialekten vun de düütsche Sied welkamen. Plattdüütsche Dialekten meent hier Plattdüütsch oder Nedderdüütsch in’n engsten Sinn, dat will seggen alle nedderdüütschen Dialekten in Düütschland (Mark-Brannenborgsch, Mekelnborg-Vöörpommersch, Noordneddersassisch, Oostfaalsch, Westfaalsch) mit Uutnaam vun dat Nedderrhiensche.

Dat nedderlandsche Plattdüütsch („Nedersaksisch“) het wegen de Schrievwiesen op nedderlandsche Grundlaag un den Inflood vun dat Nedderlandsch as Dackspraak ene egen Uutgaav vun de Wikipedia. För dat Plautdietsche („Mennoniten-Plattdüutsch“) givt dat ene Uutgaav in de Wikimedia Incubator.

De plattdüütsche Wikipedia will keen Standardplatt schapen. Du kannst in allen baven fastleggt Dialekten schreven as di „de Snuut wussen is“.

Dialekten un Schrievwiesen in de Artikels

Artikels schöölt in enen eenheidlichen Dialekt un ene eenheidliche Schrievwies schreven warrn. Artikels mit lokalen Betog schöölt in enen Dialekt uut de Regioon schreven warrn.

Bearbeiden vun Artikels in anner Dialekten

Artikels schöölt in den Dialekt vun den Hööftautor staan blieven. Wenn du Kleenkraam in enen Artikel verbetern wult, versöök dat in den Dialekt vun den Artikel to schrieven.

Wenn du enen komplett ne’en Afsnid in enen Artikel schrieven magst, kannst du den Stremel eerst in dienen Dialekt schrieven un den Hööftautor beden, den Text in sienen Dialekt ümtoschrieven. De Artikel schall opletzt in enen eenheidlichen Dialekt un ene eenheidliche Schrievwies staan.

Uutnamen

Uutbo vun Stubbens

Een Stubben (< 8000 Bytes oder < 300 Wöör) dörv in enen anner Dialekt ümschreven warrn, wenn de Artikel stark uutboot warrt (op > 15.000 Bytes oder > 1500 Wöör).

Artikels mit lokalen Betog

Artikels mit starken lokalen Betog (Gemenen, Personen, Brüük usw.), de in enen Dialekt uut ene anner Regioon schreven sünd, dörvt jümmers in den lokalen Dialekt ümschreven warrn.

Neologismen

För Neologismen rund üm de Wetenschoppen un moderne Technik schall dat Beleggen buten de Wikipedia in moderne Wöörböker (to’n Bispeel: Netzwörterbuch, Neue plattdeutsche Wörter) oder in de plattdüütsche Schrieveree geven. Wenn dat Nood doot, heel ne’e Wöör to schapen schöölt de Wöör eerst ünner „Mi fehlt dat Woort“ oder to besünner Themen in dat passige Wikiprojekt besnackt warrn (Planten un Deerter to’n Bispeel in dat Wikiprojekt Biologie).

Juxwöör schöölt nich bruukt warrn. Se passt nich to den Stil vun ene Enzyklopädie un stütt dat Bild vun’n Plattdüütsch as „Spraak to’n Högen“. Daarför schöölt beter eernsthaftige Uutdrück bruukt warrn (to’n Bispeel: Stoffsuger statts Huulbessen, Hummel statts Plüüschmoors, Peersch statts Plüüschappel).

Kiek ook bi

Richtlienen in de plattdüütsche Wikipedia