Werner Heukamp

Werner Heukamp (* 20. Mai 1929 in Hörstel; † 29. Juli 2020 in Ibbenbüren) weer en düütsch kathoolsch Pfarrer, Heimatforscher un Schriever, de hööftsächlich in plattdüütsch schrifft. Överregional bekannt wurrn is he dör sien „Plattdütsket Gebiädbook“ (1996).

Leven un Wark

He is de Söhn vun de Backermeester Heinrich Heukamp un de sien Fru Maria, borene Stehmann. 1950 hett he sien Abitur in Rheine maakt un hett dornah Theologie an de Westfäälsch Wilhelms-Universität in Mönster un in Mainz studeert. Siet disse Tiet is he Lidmaat vun de so nömmt Schönstatt-Bewegen. An’ 16. März 1957 hett hüm Bischop Michael Keller to’n Preester weiht. Dornah weer Werner Heukamp van 1957 bit 1969 as Kaplan in Borken-Gemen, Hopsten un an St. Martinus in Graiwen togange. 1969 wurr he denn Paster vun de Graiwener St.-Mariä-Himmelfahrt-Gemeend, de he bit to sien 65. Lebensjohr 1994 leit hett. Ok dornah weer un is he noch för de Kark unnerwegens.

As Schriever sett sück Heukamp vööl för dat Erhollen un de Pleeg vun de nedderdüütsche Spraak in un hett plattdüütsch Lesewettstrieden an de öörtlich Schoolen anregt. Sien literarisch Vörbild is sien Amtsbröer Augustin Wibbelt, de he ok faken ziteeren deiht. To’n Aarntdankfest fiert he in Recke un Steinbeck regelmäßig plattdüütsch Messen. Vööl Spood, ok överregional, harr he mit sien 1996 eerstmals verapentlichent Plattdütsket Gebiädbook, wat mehrere Uplagen belevt hett. För disse Tosommenstellung hett Heukamp tallriek Psalmen un anner Textstellen ut dat Oll Testament un ut dat Nee Testament, aber ok Beed (so as Vater Unser), dat Ave Maria oder dat Apostoolsch Globensbekenntnis in plattdüütsch översett un noch wat dorto schreben. Dorto hörr aber ok to’n Bispeel de Sunnengesang vun Franz von Assisi oder Beed vun Eduard Mörike. Dormit weer Heukamp sien Tiet wiet vörut, wiels dat dat eerste offizielle nedderdüütsch Gebetbook eerst 2004 ünner de Titel „Morgen roop ick Di wedder an“ vun dat Bisdom Mönster verapentlicht wurr.

Heukamp verfaat sien Texte in Mönsterlänner Platt, wobi he weet, dat enkelde Utspraak un Bedüden vun Wöör lokal bannig verscheeden wesen könnt. Dorüm geev in dat Vörwoort vun sien Plattdütsket Gebiädbook (S. 7) den Hinwies:

"Jedet Duorp un jede Stadt hätt bi siene plattdütske Sprauke siene eegenen Lute. Daorüm is et guet, dat Gebiäd toeerst still vör sik to liäsen un dann lut in siene eegene Sprauke to säggen."

Siet sien Tiet in Graiwen is Heukamp ok as Heimatforscher aktiv, hier insbesünnere för de Oldkreis Teckelnborg, de vörmalige Grafschap Lingen un, siet dem he in Recke wahnen deiht, befaat he sück ok mit de Historie vun disse Oort. Sien heimatkundlich Erkenntnisse verapentlicht de Geistliche in de meest in tweeweek Afstännen rutgeven Rubrik Unnerwäggens düör Riecke in de „Ibbenbürener Volkszeitung“.

Warken (Utwahl)

Pluggen Hiärm. Een Original ut Greiwen, Graiwen 1988, ISBN 3-923166-28-1
Märchen un Fabeln ut de aolle un nie Tied in de plattdütske Spraoke. Frie naovertellt un söwes maakt van Werner Heukamp, Münster 1991, ISBN 3-7923-0616-6
Plattdütsket Gebiädbook. Tosammenstellt van Werner Heukamp, Ibbenbüren 1996, (3. Auflage, Ibbenbüren 1997, ISBN 3-921290-90-2)
Lob Gottes am Wegesrand. Bildstöcke, Wegekreuze und Klausen in Recke, Recke 1997
De löchtende Stiärn. Weihnachtsgeschichten in plattdeutscher Sprache, Ibbenbüren 1998, ISBN 3-932959-04-3
Unnerwäggens düör Riecke, Steinbeck un Espel. Mit Abstechern in die ältere und neuere Geschichte; von Menschen und Begebenheiten erzählt in Hoch- und Niederdeutsch, Ibbenbüren 2001, ISBN 3-932959-22-1
Von Menschen und Begebenheiten. Unnerwäggens düor Riecke, Steemke und Espel erzählt in Hoch- und Niederdeutsch. Ibbenbürener Vereinsdruckerei (IVD), Ibbenbüren 2006, 182 S., ISBN 3-932959-51-5

Kiek ook bi

List vun plattdüütschen Schrievers

Weblenken