Wapen vun Gambia

Vun Wikipedia
Wapen vun Gambia

Dat Wapen vun Gambia is in de Form, as dat op dat Bild wiest warrt, siet den 18. November 1964 in dat westafrikaansche Land Gambia in Bruuk.

Beschrieven[ännern | Bornkood ännern]

Dat Wapen wiest en blau Schild mit en witten un grönen Rahmen, in dat twee Warktüüch överkrüüz dorstellt sünd. Disse beiden landweertschopplichen Redschoppen warrt vun de Mandinka bruukt. Dat een is en Ex, en so nöömte dibongo, de bi de Oorn vun de Eerdnööt bruukt warrt, dat annere is en Hack, de so nöömte dabandingo, de ton Wegmaken vun Unkruut insett warrt.

Över’n Schild ist en Ridderhelm to sehn, op den en Eerdnuttstruuk steiht, de Frücht driggt. Ünner’n Schild is en Spröökband dorstellt mit dat Natschonalmotto vun Gambia: Progress, Peace, Prosperity („Wieterkamen, Freden, Wohlstand“)

Twee Löwen deent as Wapenholler. Een dorvun hett de glieke Ex, de annere de glieke Hack as de in den Schild dorstellt sünd. De beiden Löwen staht för de Kolonialhistorie vun Gambia as Deel vun’t britsche Weltriek. De beiden Warktüüch stellt de Wichtigkeit vun de Bueree in Gambia dor. Dat warrt ok seggt, se staht för de beiden gröttsten ethnischen Gruppen in’t Land: de Mandinka un de Fulbe. De Palm, de över’n Wulst op’n Helm to sehn is, is gliektietig ok de Natschonalplant vun Gambia.

Histoorsch Emblem[ännern | Bornkood ännern]

De Königin Elisabeth II. hett dat Wapen 1964 an de Kolonie Gambia verleht. Sien opbo is dorüm engelsch prägt. Dat hett de Steed innahmen vun en Emblem, dat en Elefant vör en Palm un en Barglandschop wiesen de. Ünnern stünn de Bookstaav G för Gambia. Dat glieke Wapen, blots mit annere Bookstaven, hebbt ok noch annere Kolonien hatt as Britisch-Westafrika, Sierra Leone un de Goldküst.