Virusinfektschoon

Vun Wikipedia

Vun en Virusinfektschoon warrt snackt, wenn Viren dat up en Leevwesen afsehn hefft un toseht, datt se dor rinkaamt un sik dor in vermehrt. Sockse Leevwesen könnt Planten, Deerter oder ok Minschen ween. Normolerweise reageert de Organissen, wenn he vun Viren angrepen warrt. Dor kann he ok en Infektschoonskrankheit bi kriegen. Viren könnt sik bloß man binnen de Zellen vun en Weert vermehren. Ohn Weert geiht dat nich. Elk Aart vun de Viren hett dor en sunnerliche Reege vun Zellen, Organe un Leevwesen bi, de se angriepen un wo se sik in vermehren deit. Dat kann angahn, dat Immunsystem kriggt mit, datt en Zell angrepen un ummuddelt warrt to'n Vermehren vun den Virus. Denn warrt so en Zell dootmaakt. Dor kummt denn en Sweer bi tostanne, dat ok annere Zellen angriepen oder tweimaken kann. Tolest kann dor denn en Krankheit bi rutsuern, de just vun düsse Aart vun Virus utlööst warrt.

Mit den Loop vun de Evolutschoon hefft sik de Viren dörsetten konnt, de an'n besten anpasst sünd an ehren Weert. Wenn de Weert dor to dull vun angrepen warrt oder tolest dootgeiht, weer dat nich good for en Virus. He bruukt ja düssen Weert, um sik to vermehren. De Krankheiten un Süken, de liekers vun den Virus bi sien Weert utlööst weert, sünd amenne man bloß Folgen vun de Infektschoon, also vun dat Immunsystem siene Reaktschoon up de Viren ehren Angreep. Bi de Minschen gifft dat allerhand Virusinfektschonen, de sünd man mack, un annere,de sünd unbannig gefährlich, egolweg, ob se behannelt weert, oder nich.

Over de ganze Welt utbreedt hefft sik de Rhinoviren. Dor kann een Snööv vun kriegen un se weern nich up to holen, just so, as de Viren, wo en Waarten vun kriggt oder Herpes simplex. Sunnerlich gefährlich sünd Viren, de sik noch nich anpasst hefft an den Minschen as ehren Weert, as dat Marborg-Virus un dat Ebola-Virus. De wecken Viren, as dat HI-Virus un dat Virus, wo een de Dullsüke vun kriegen kann, könnt nich upholen weern bi dat Vermehren, wiel se den Weert en tiedlang nich schaden doot, ofschoonst de Viren al wietergeven weern könnt.

In'n Momang gifft dat nich veel Virusinfektschonen, wo een sik al vorweg gegen pocken laten kann.