Vila do Maio

Vila do Maio (ehmols Porto Inglês „Haven vun de Englänners“) is de Hööftstadt vun’t Eiland Maio, een vun de negen bewahnten Eilannen vun de Republiek Kap Verde.

Geografie

De Stadt Vila do Maio liggt an de Süüdwestküst vun’t Eiland Maio. Dat is de gröttste un ok bedüdenste Stadt, as dor de Haven liggt, över den de gröttste Deel vun’n Worenhannel afwickelt warrt. Ok de natschonale Flaaghaven vun Maio is in de Neeg vun de Hööftstadt. Vergleken mit de annern Eilannen vun Kap Verde geiht dat op Maio un so ok in Vila do Maio teemlich ruhig un macklich to.

Dat Ümland warrt bestimmt dör Wööst un Halfwöstenlandschap, na Noorden hen gifft dat ok en poor Wooldrebeden. Vun Vilo do Maio gaht twee Straten ut. De eerste föhrt an de Westküst hooch na Noorden na’t Feriendörp Morro un wieter na Calheta, wiel de annere op de Oostsiet vun’t Eiland föhrt un denn wieter an de Oostküst hooch na Pedro Paz. De Küst üm Vila do Maio besteiht vör allen ut fienen Sandstrand, woneem man ok goot Baden un Swemmen kann. Veel Tourismus gifft dat op dit Eiland noch nich.

Inwahners

Johr	Inwahnertall
1990 Juni, Zensus	1.573
2000 Juni, Zensus	2.673
2005 Januar, Bereken	3.009

Historie

Maio is 1460 opdeckt worrn, man dat Wösteneiland weer toeerst nich recht intressant för de Kolonialmacht Portugal, jüst man, dat se Slaven as Harders dor ansiedelt hebbt, de den Opdrag haarn Veehtüüch to tüchten, dat se dormit de Stadt Cidade Velha un de Slavenscheep, de dor Hollt maken deen, mit Fleesch un Hüüt versorgen künnen. Wiel dat 15. Johrhunnert füng denn dorto de Anbo vun Boomwull an un de eersten Lüüd hebbt sik op dat Eiland en Tohuus socht.

De Oort is toerst ünner den Naam Porto Inglês bekannt worrn. Dat stammt ut de fröhere Kolonialtiet, as vun’t 17. bit to’n 19. Johrhunnert elk Johr bit to achtig britsche Scheep dat Eiland anlopen hett, üm dor Solt to laden. Dat Solt keem ut de Salinen, de noordwestlich vun de Stadt leegt un ok vundaag noch in lütte Mengden Solt produzeert, dat na Guinea-Bissau utföhrt warrt.

In’t Stadtzentrum gifft dat en Kark, de 1872 boot worrn is. Dat Geld dorför keem ut en egens dorför inföhrte Soltstüer. Nich wiet weg vun’n Karkenplatz liggt de Praça Évora, woneem dat fröhere Huus vun den Boherrn António Évora steiht, dat fröher woll mol dat schönste Huus op dat hele Eiland wesen is. De Boherr beseet faktisch bit to’n 20. Johrhunnert dat Monopol op dat Solt vun Maio. De Naam Porto Inglês is 1975 ännert worrn, as Kap Verde na de Nelkenrevolutschoon unafhangig worrn is. To de Tiet is ok de Överstraat in Vila do Maio anners nöömt woorn un heet nu Avenida Amílcar Cabral, na den Natschonalhelden Amílcar Cabral, de veel för de Unafhangigkeit doon hett, man bi en Anslag wiel de Revolutschoon doodschaten worrn is.