Ventilatordood

De Ventilatordood is en Höhnerglöven ut Süüdkorea. Veel Süüdkoreaners denkt, dat een doodblieven kann, wenn een en Ventilator över Nacht in en slaten Kamer lopen lett.

Se meent, dat de Lufttog dat Lief so wied afköhlt, dat de Minsch ünnerköhlt. Anner Lüüd seggt, dat schall dor an liggen, dat de Ventilator den Luftdruck ännert un de Minsch stickt oder dat de Ventilator giftig Gas utströömt, dat sik in en slaten Ruum sammeln kann. Dat is allens Tüdelkraam un narms buten Süüdkorea gifft dat Berichten vun Lüüd, de dör Ventilators doodbleven sünd. Aver in Korea höllt sik de Glöven liekers. Sogor Dokters seggt in Süüdkorea, dat dat den Ventilatordood worraftig gifft, un in’n Sommer doot de Narichten in’t Feernsehn jümmer wedder över Lüüd berichten, de mit en Ventilator in’e Kamer doodbleven is. Sogor de Regeren hett dor al vör warnt, Ventilators snachts lopen to laten. Ventilators warrt in Süüdkorea ok all mit en extra Tiedschalter verköfft, dat een den Apparat so instellen kann, dat he sik na en Tied vun alleen utschalten deit.