Veelzellers
| Veelzellers | ||||||||
|---|---|---|---|---|---|---|---|---|
 Unnen: Porzellankrabbe, Geelbostaras, Anubispavian | ||||||||
| Systematik | ||||||||
| ||||||||
| Wetenschoplich Naam | ||||||||
| Metazoa | ||||||||
| Latreille, 1829 |
De Veelzellers (wetenschoplich Metazoa, vun ooldgr. μετα meta „achternah“ un ζῷον zóon „Deert“) sünd en Taxon in de Zoologie. Dor weert all Gruppen vun Deerter in tohopenfaat, de ut mehr as een Zell bestahn doot. Hüdigendags sünd bi 1,2 Mio. Aarden vun veelzellige Deerter bekannt. Vunwegen, datt dor en ganzen Barg vun noch gor nich in de Wetenschop beschreven wurrn is, warrt annahmen, dat weern 10 bit 20 Mio. Aarden, de dat alltohopen gifft. Vun de bitherto bekannten Aarden maakt de Liddfööt (Arthropoda) dor mit um un bi een Mio. Aarden mehr as 80 % ut. Binnen de Liddföte stellt de Kävers un de Bottervagels tosamen de Hälft vun all Aarden. Weekdeerter sünd mit bi 100.000 bekannte Aarden hüdigendags de tweet gröttste Stamm. Tohopen mit de Liddföte maakt se 90 % vun all Aarden ut, de vundagen up'e Eer to finnen sünd. De Warveldeerter stellt 5 % vun de Aarden mank de Veelzellers.[1] In wetenschoppliche Schriften weert metazoa hüdigendags faken as synonymen Begreep for Deerter (Animalia) bruukt. Tohopen for de Veelzellers un de eenzelligen Vertreders ut ehre Stammgrupp is 2002 dat nee Taxon Holozoa upmaakt wurrn.[2]
Kennteken
[ännern | Bornkood ännern]Kennteken vun de Veelzellers is nich bloß de Umstand, datt se ut allerhand Zellen tohopensett sünd. Man düsse Zellen hefft ok all annere Upgaven un verscheelt sik vun deswegen. So gifft dat al bi de Swammdeerter verschedene Zelltypen, de to'n Freten, to'n Aten (Kragenpietschenzellen) oder to'n Boon vun dat Skelett bruukt weert. Annere Kennteken sünd, datt de Geslechtszellen unnerscheedlich tostanne kaamt, datt de Spermien mit „Pietschen“ (Steerte) versehn sünd, datt de befrucht' Eizell dör Afsnören deelt warrt (Zelldeelen) un de Mitochondrien ehr Genom.