Utlehntransfer

En Utlehntransfer passeert, wenn en mehrsprakigen Spreker bi dat Snacken in de een Spraak spontan Utdrück ut de annere Spraak in siene Sätz inföögt. Dorbi warrt, anners as bi den Koodwessel nich de ganze Spraak wesselt, man blots enkelte Wöör, ahn dat de Struktur vun de Spraak, in de inföögt warrt, dorbi ännert warrt. Dat kummt vör, wenn de Person nich fähig is, gau op de Begrepen to kamen, de passt. Dat kann dor an liggen, dat de Spraakkenntnis nich good noog is, oder dor an, dat de Spraak kene Utdrück för de Konzepten hett, över de de Person snacken will. Wöör, de eerst blots dör Utlehntransfer in de Spraak kaamt, köönt later vullen Ingang in de Spraak finnen, wenn se faken noog bruukt warrt.