Trygve Lie

Vun Wikipedia
(wiederwiest vun Trygve Halvdan Lie)
Trygve Lie

Trygve Halvdan Lie (* 16. Juli 1896 in Grorud, Norwegen; † 30. Dezember 1968 in Geilo, Norwegen) is en Politiker un Afkaat ut Norwegen ween. Vun 1946 bit 1952 weer he de eerste Generalsekretär vun de Vereenten Natschonen, de offiziell beropen wurrn weer.

Leven[ännern | Bornkood ännern]

Trygve Lie studeer Rechtswetenschoppen an de Universität in Oslo. As Sozialdemokraten vun de Arbeiderpartiet is he 1936 Justizminister un dree Johre later Hannelsminister vun sien Land wurrn.

Nadem dat Düütsche Riek Norwegen an'n 9. April 1940 angrepen hett, is he mit König Haakon VII. un de Regeerung in dat Exil na London gahn. Vun 1941 bit 1945 seet he in de norweegsche Exilregeerung as Butenminister.

An'n 1. Februar 1946 is he to'n eersten Generalsekretär vun de Vereenten Natschonen maakt wurrn. Vunwegen datt he in London ween weer, hett de Westen em just so gellen laten, as de Sowjetunion, de dat goot funnen hett, datt he to en linke Regeerung tohöörn dö. He hett de Geschäfte övernahmen vun Gladwyn Jebb, de bit dorhen för'n Övergang Generalsekretär ween weer.

He fung mit veel Iever an, man denn is dat fix düütlich wurrn, datt de Welt in twee grote Blöcke upspleten weer. Beide Sieten hefft em vörsmeten, he hull dat mit de annere Siet. De groten Mächte versöchen ok, de UNO in'e Hand to kriegen. Sunnerlichen Striet geev dat um de Fraag of dat kommunistische China oder de Exilregeerung in Taiwan en Seet in den Weltsekerheitsraat kriegen scholl. He hett dat avers henkregen, datt de Sowjetunion ut den Iran aftrocken is un datt dat to de Allgemeene Verklaren vun de Minschenrechte kamen is. 1950 hett de Weltsekerheitsraat beslaten, datt Noordkorea angrepen weern scholl. Dormols is de Sowjetunion dor nich bi ween. Nu harr de USA den Besluss in'e Hand, de datt mööglich maken dö, an de Siet vun Süüdkorea gegen Noordkorea an to gahn. Süüdkorea weer ja angrepen wurrn. Datt Lie sik achter düssen Besluss stellen dö, hett för Stalin klaar maakt, datt he nich up den Oostblock siene Siet stunn. Dor hett he sik dor achter klemmt, Lie af to setten. 1951 is he, gegen den Willen vun de Sowjetunion, vun de Vullversammeln as generalsekretär vun de Vereenten Natschonen wedder wählt wurrn, man an'n 10. November 1952 hett he Bott geven. He meen, sien Arbeit möök keen Sinn mehr. Nien Nafolger Dag Hammarskjöld hett he vundeswegen mit de Wöer begrött: „Willkamen in New York un bi de Vereenten Natschonen. Se övernehmt hier den unmööglichsten Job up de Eer.“

Vun 1963 bit 1964 is he Industrieminister in Norwegen ween. Vun 1964 bit 1965 hett he wedder dat Amt vun en Hannelsminister utöövt. Trygve Lie is 1968 in't Oller vun 72 Johren an en Hartinfarkt sturven.

Weblenken[ännern | Bornkood ännern]