Titeloplaag

En Titeloplaag is en Oplaag von en Book, bi de en öllere Oplaag von dat Book hernahmen un bloots dat Titelblatt utwesselt warrt. Dat betüht sik op Böker, de al druckt sünd un över längere Tiet nich verköfft worrn sünd oder ok op Böker, de mit de olen Druckbagens un en neet Titelblatt druckt warrt.

Dat warrt to’n Bispeel daan, wenn den Verleger dücht, dat dat ole Titelblatt nich mehr na’n Gesmack von de Lesers is. Dat kann aver ok daan warrn, wenn de Titel den Verlag wesselt un de ne’e Verlagsnaam op dat Titelblatt stahn schall.

Düsse Praxis stammt ut de Tiet, as Böker noch separat druckt un eerst later bunnen worrn sünd. Vondaag warrt Böker direkt in eens druckt un bunnen un dat Titelblatt kann nich mehr uttuuscht warrn. Dorüm speelt Titeloplagen nu kuum noch en Rull.