Thormählen Schweißtechnik

De Thormählen Schweißtechnik AG is en Ünnernehmen för Schenenbo un Schweißtechnik mit Seet in Bad Olschloo in Sleswig-Holsteen.

De Schweißinschenör Klaus Thormählen harr de Firma as GmbH in’n Juli 1989 in Ahrensborg grünnt, nadem he siene Arbeit bi de Bundsbahn opgeven harr. Veer Lüüd weren to de Tiet bi de Firma anstellt. 1993 hett dat Ünnernehmen tosamen mit de Schlattner AG sik en Maschien utklabüstert, de Schenen ahn Lücken tohoopschweißen kann.

1995 sünd se mit ehren Sitt vun Ahrensborg na Bad Olschloo ümtagen. Siet den 1. Februar 2001 is dat Ünnernehmen ene Aktiengesellschop. 2006 hett de Firmengrünner Klaus Thormählen dat Leid as Vörstandsbaas an Berthold Brinkmann afgeven.

Aktuell hett dat Ünnernehmen üm un bi 250 Lüüd anstellt un maakt en Ümsatz vun üm un bi 60 Millionen Euro.

Filialen bestaht in Berlin, Köln, Bitterfeld un Tel Aviv.

An’n 28. März 2006 geev dat enen Brandanslag op den Firmensitt, bi den fief Lasters afbrannt sünd, wat en Schaden vun 300.000 Euro bedüden dei. Gegner vun de Globalisierung hebbt sik dorto bekannt, vun wegen dat dat Ünnernehmen mit sien Iesenbahnprojekt in’n Sudan dat Land utbüden dee. Ob disse Lüüd, de sik Internationalistische Zellen nömen dein, dat aver würklich weren oder ob se Triddbrettfohrer weren, dat is nich kloor.

Arbeiden

Siet 2003 plaant de Firma tohoop mit annere Ünnernehmen den Bo vun en Iesenbahnsystem vun 4100 Kilometer in’n Süüdsudan. De Opdrag vun de Regeren vun den Staat, de noch gor nich unafhängig is, hett en Volumen vun alltohoop 2,5 Milliarden Euro.

2004 hett de Firma an de Schenen twischen den Athener Bahnhoff SKA un den Oort Kiato mitboot, de rechttiedig to de Olympsche Spelen 2004 trech wesen schull.