Thomas Völsch

Vun Wikipedia
Zur Navigation springen Zur Suche springen

Thomas Völsch (* 9. Februar 1958 in Hamborg; † 28. November 2017 ok dor[1]) weer en düütschen Politiker von de SPD. He weer von 2008 bet 2011 Maat von de Hambörgsche Börgerschop un von Anfang 2012 bet to sien Dood in’n November 2017 Bezirksamtsbaas von’n Hambörger Bezirk Horborg.

Leven[ännern | Bornkood ännern]

Völsch is 1958 in Hamborg boren un weer op dat Gymnasium Eppendörp. Na de School hett he an de Fachhoochschool för öffentliche Verwaltung in Hamborg studeert un dat Studium as Diplom-Verwaltungswirt afslaten. Na dat Studium güng he in’n öffentlichen Deenst. He hett toeerst in’t Bezirksamt arbeidt un denn in’n Rekenhoff von de Fre’e un Hansestadt Hamborg. Von dor is he 2007 na de Behörde för Bildung un Sport wesselt. Von 1994 bet 2004 weer he hauptamtlichen Geschäftsföhrer von de SPD-Frakschoon in de Börgerschop un weer in düsse Tied von’n öffentlichen Deenst freestellt.

Völsch weer verheiraadt un harr twee Söhns.[2] He is an’n 28. November 2017 doodbleven, nadem he al en ganze Tied Kreeft harr.

Politik[ännern | Bornkood ännern]

Völsch is 1990 in de SPD rin. He weer von 1996 bet 1998 Vörsitter von’n Oortsvereen Fischbeek, von 2003 bet 2011 Vörsitter von’n Oortsvereen Neegraven-Fischbeek un siet 2011 Bisitter. Tosätzlich weer he siet 2006 ok Viez-Kreisvörsitter in Horborg. In’n Februar 2008 is he bi de Börgerschopswahl in’n Wahlkreis Süderelv as Afornten in’e Hambörgsche Börgerschop intagen.

An’n 7. Oktober 2010 is Völsch von’n Kreisvörstand un de Bezirksfrakschoon von de Horbörger SPD as Kannedaat för dat Amt as Bezirksamtsbaas von’n Bezirk Horborg nomineert worrn,[3] de an’n 26. Oktober wählt worrn is. De swart-gröne Mehrheit in’t Horbörger Raadhuus hett aver Torsten Meinberg von de CDU ünnerstütt. Bi de Börgerschopswahl 2011 hett he dat beste Resultaat von de Direktkannedaten in’n Wahlkreis Süderelv hatt un töög wedder in de Hambörgsche Börgerschop in. He is as Viez-Frakschoonsvörsitter von de SPD-Frakschoon wählt worrn. To Anfang 2012 hett he sien Mandaat daalleggt un is Bezirksamtsbaas von’n Bezirk Horborg worrn.[4] In’n September 2017 is Völsch von de Horbörger Bezirksversammlung wedderwählt worrn[5] un in’n November mit Wirkung to’n 1. Januar 2018 von’n Hambörger Senaat för nochmaal söss Johr in’t Amt bestätigt worrn. En poor Daag later hett he den Senaat beden, dat wedder trüggtonehmen un em vör de Tied in’n Rohstand to versetten, denn he harr Kreeft.

Footnoten[ännern | Bornkood ännern]

  1. Trauer um Thomas Völsch, ndr.de an’n 28. November 2017
  2. André Zand-Vakili: Harburgs Bezirksamtsleiter Thomas Völsch ist tot, harburg-aktuell.de an’n 28. November 2017
  3. [1] Harburger Anzeigen und Nachrichten an’n 8. Oktober 2010
  4. Thomas Völsch ist neuer Bezirksamtsleiter in Harburg, Hamburger Abendblatt an’n 30. November 2011
  5. Andreas Göhring: Bezirksamtsleiter Völsch mit Rekordergebnis in zweite Amtszeit, harburg-aktuell.de an’n 27. September 2017