Swieg still, Jung

Swieg still, Jung is en Theaterstück för acht Personen (veer Froonslüüd, veer Mannslüüd), dat vun Fitzgerald Kusz op Fränksch as Schweig, Bub! schreven worrn is un dat Walter A. Kreye in’t Plattdüütsche översett hett.

Toeerst opföhrt worrn is dat Stück an’n 6. Oktober 1976 in dat Schauspeelhuus Nürnberg mit Herbert Lehnert un Friedrich Schirmer as Speelbaas. Kusz hett dat Stück in sien Nürnberger Dialekt schreven. Dat is mit de Tied denn ok in en ganze Reeg annere Dialekten översett worrn. Op Plattdüütsch, Berlinsch, Hessisch, Swääbsch, Pälzisch, Rhiensch, Swiezerdüütsch, Öösterrieksch, Bairisch, Ruhrdüütsch, Sächsisch, Alemannsch un Fläämsch.

Kreye sien plattdüütsche Version is an’n 6. Oktober 1977 an de August-Hinrich-Bühn Ollnborg toeerst opföhrt worrn. En Version, de vun Cyriacks un Nissen bearbeidt worrn is, hett an’n 25. August 2008 an dat Ohnsorg-Theater sien Premier fiert.

Dat Stück hannelt vun de Kumfermatschoon (in de översett Versionen je na Region deelwies en Kommunion) vun en Jung. De Groten doot Supen un Freten, Schabbern un Strieden, blot de Jung kummt dor nich bi to Woord.