Steenkammern

Steenkammern sünd Steenhüser ween, de in’t Middelöller boot wurrn sünd. Faken weern se utboot to’n Wohntoorn. In Bremen sünd se na den Tonaam vun jem ehren Besitter nömmt wurrn. Achter den Naam is denn dat Woort –borg anbackt wurrn. So heten de Toorns denn Aschenborg, Mattenborg, Bucksborg, Hollemannsborg usw. Düsse Steenkammern sünd woll üm 1300 rüm upkamen. Wenn dat brennt hett in de Stadt oder wenn dat Upstänn geev, denn hefft de Egners sik dor in torüchtagen.