Statistisch Amt

Vun Wikipedia
Zur Navigation springen Zur Suche springen

En Statistisch Amt is en Amt vun en Staat oder en anner Organisatschoon, dat zentral statistische Daten sammelt. Meist elkeen Staat op de Eer hett so’n Amt. Dat Sammeln vun statistische Daten is vör allen wichtig, dat de Staat good för de Tokumst planen kann. Wenn de Daten wiesen doot, dat jümmer mehr Kinner boren warrt, denn mutt de Staat al rechtiedig för noog Kinnergoorns un Scholen sorgen. Anners wenn dat jümmer weniger Kinner gifft, denn schall de Staat sien Geld villicht beter in gode Olenhüüs steken (oder in Kampagnen, de för mehr Kinner warven doot). Den Staat mit sone Informatschonen to versorgen is de Opgaav vun de statistischen Ämter. Blangen demograafsche Daten to de Inwahnertallen, Öllersstruktur un so wieder warrt mehrsttiets ok Daten to Weertschop, Arbeitsmarkt un all sowat sammelt.

De Daten mööt wo her kamen. Dat warrt mit’n Zensus maakt, bi den in’t ganze Land Utfragers na de Hüüs kamen doot mit’n Fraagbagen. Na Mööglichkeit schall den denn elkeen utfüllen. So’n Zensus warrt in vele Länner all teihn Johr maakt. Fakener is toveel Opwand (ofschoonst dat ok Länner mit körtere Fristen gifft) un länger, denn sünd de Daten al to oolt, dat se noch good planen köönt. Aver ok de normalen annern Ämter in dat Land doot jemehr Daten dat statistische Amt tostüürn.

För en Översicht över de statistischen Ämter vun de Länner op de Eer, kiek bi List vun statistische Ämter.