Slott Ippenborg
Slott Ippenborg is en Adelswahnsitt in’n Stil van de Neegotik in den Oortsdeel Lockhuusen van Bad Essen in den Landkreis Ossenbrügge (Neddersassen). De is siet mehr as 600 Johr in Besitt van de Familie von dem Bussche-Ippenborg.
Geschichte[ännern | Bornkood ännern]
Dat hüüdige Slott harr twee Vörgängerbauten, en befestigte Borg ut de Tiet van dat laat Middelöller in de Övergang to de Fröh Neetiet un en barock Herrenhuus, dat nah den Dartigjohrigen Krieg entstunn. 1345 wurr dat as castrum Ybbenborg erwähnt.
Trutzborg[ännern | Bornkood ännern]
De eerste Bau stammt van dat Enn‘ van dat 14. Johrhunnert. De Ridder Johann von dem Bussche hett en mit Scheetscharten versehen Borg baut, de van en Waterschloot umgeven weer un de man blots över en Toogbrügg recken kunn. Tüschen den Slottschloot un en wiederen buteren Schloot leet he en befestigten Wall anleggen. De um en Binnenhoff baut Borg weer mit Wahnrüüms för Ridder un Knappen, Kööken, Kapelle, Rüstkamer, Ridder- un Bökersaal, Junkerstuuv as ok Wahnrüüms för Gäste utstatt. De Borg bestunn bit 1811. Se wurr denn wegen Baufälligkeit afreeten.
Herrenhuus[ännern | Bornkood ännern]
Nördlich van de eerste Borg harr de Familie von dem Busche all nah den Dartigjohrigen Krieg an den Standoort van dat hüüdige Slott en Herrenhuus mit twee Flögels in’n Stil van den Barock uprichten laaten. Ok dit Huus harr weer en Huuskapelle. Deren Glock ut dat Johr 1724 gifft dat noch. En Blitzslag hett 1756 den barocken Geevel an den Hööftflögel van dat Herrenhuus in Dutt haun. 1862 wurr ok dat Herrenhuus afdragen, wiel dat van Steenschwamm befallen weer.
Neegotisch Slott[ännern | Bornkood ännern]
Graf Wilhelm von dem Bussche leet up de Fundamente van dat Herrenhuus tüschen 1862 un 1867 ut Ibbenbürener Sandsteen dat hüüdige neegotische Slott mit mehr as hunnert Rüüms uprichten. In de 1930er Johren wurr dat van Hermann Graf von dem Bussche un sien Fru Vera Gräfin von dem Bussche umfaatend renoveert. Dat Slott kreeg Zentraalheizung un Bäder wurrn inbaut. De neegotische Utstattung bleev aber erhollen. Wiedere Renoveerungen wurrn in de 1960er Johren vörnommen. So wurr dat Daak nee deckt. In de 1980er Johren kreegen de Toorndaaken en nee Verkleeden ut Kopper, buterdem wurr en Wedderfahn vergold. De repräsentative Ingangshall un de Fenster wurrn in de 1990er Johren renoveert.
Slottpark[ännern | Bornkood ännern]
Siet 1976 leven Philip Freiherr von dem Bussche un Viktoria Freifrau von dem Bussche up dat Anwesen, tonächst in en Kötterhuus; later truck dat Paar mit de wassen Familie in dat Slott um. Philip Freiherr von dem Bussche bewertschapt den landwertschaplichen Bedriev mit 300 Hektar Ackerland un 330 Hektar Wald. Victoria Freifrau von dem Bussche is en Hobbygörnersche, de sück för engelsch Gordens begeistert. Wohrteeken van de Ippeenborger Festival is siet 2001 de Waterskulptur Taraxatum (Löwenzahn) van Ugo Dossi ut en 300 Johr olt Eekenstamm.
De Slottpark Ippenborg weer 2010 en Karnrebeet van de 4. Landsgordenschau in Neddersassen, de an’n 31. März 2009 an Bad Essen vergeven wurr.
Blots wiels de jährlichen veer Festivals könnt dat neegotisch Slott, de groot Kökengorden, de kunstvull Schaugordens un dat nee Rosarium 2000+ besichtigt wurrn. An anner Daag kummt man as Besöker nich up dat Gelände. 2017 weern de Themengordens in’n Mai, Juni, Juli an all Sönndagen apen.
Literatur[ännern | Bornkood ännern]
- Viktoria von dem Bussche: Das Leuchten im Schatten der Bäume.. In: Eva Kohlrusch: Faszinierende Frauen und ihre Gärten. 2. Uplaag. Callwey, München 2010, ISBN 978-3766718211, S. 14–21.
Weblinks[ännern | Bornkood ännern]
Koordinaten: 52° 20′ 25″ N, 8° 21′ 41″ O