Sievert (Eenheit)

Vun Wikipedia
Eenheit
Norm SI-Eenheit
Naam Sievert
Grött Äquivalentdosis
Eenheitenteken Sv
Formelteken H
nöömt na Rolf Sievert

Dat Sievert (Eenheitenteken: Sv) is de Maateenheit vun verschedene Strahlendosen, de en Gewicht bimeten warrt. De Eenheit warrt to’n Meten vun de Strahlenbelasten vun bioloogsche Organismen bruukt un warrt bi de Analys vun’t Strahlenrisiko insett. Dat Sievert warrt anwennt as Eenheit för de Äquivalentdosis, de effektive Dosis un de Organdosis.

Ümrekent is 1 Sv = 1 J/kg, wat en teemlich grote Äquivalentdosis is. Praktisch warrt dorüm de vörkamen Weerten as Millisievert (1 mSv = 0,001 Sv) oder Mikrosievert (1 μSv = 0,000001 Sv) angeven.

Strahlenbelasten[ännern | Bornkood ännern]

As Vergliek to’n Afschätten vun en Strahlenrisiko kann de natürliche Strahlenbelasten deenen. In Düütschland liggt de Äquivalentdosis in de Hööch üm un bi 0,002 Sievert in’t Johr[1].

Dosisleistung ahn Bedenken Ingrieprichtweert för langfristig Ümsiedeln
1 mSv (1.000 µSv) in’t Johr[2] 100 mSv (100.000 µSv) in’t Johr[3]
0,02 mSv (20 µSv) in de Week 2 mSv (2.000 µSv) in de Week
0,003 mSv (3 µSv) an’n Dag 0,3 mSv (300 µSv) an’n Dag
0,000 1 mSv (0,1 µSv) in de Stünn 0,01 mSv (10 µSv) in de Stünn

De hööchste Dosis in’t Johr, de för Lüüd verlööft is, de vun Beroops wegen mit Strahlen to kriegen hebbt, liggt bi 20 mSv, wobi över’t hele Beroopsleven aver nich mehr as 400 mSv tosamenkamen drööft. För normale Inwahners liggt disse Weert bi 1 mSv (de natürliche un möögliche medizinische Strahlenbelasten sünd dor nich mit inrekent). Kinner in’n Mudderlief drööft bit to de Geboort nich mehr as 1 mSv Strahlendosis afkriegen[4].

Afkummst un olle Eenheit[ännern | Bornkood ännern]

De Eenheit is na Rolf Sievert nöömt. Dat weer en sweedschen Mediziner un Physiker, de sik en Naam maakt hett bi’t Inföhren un Wieterentwickeln vun’n Strahlenschuul. Vör den 31. Dezember 1985 gell noch dat Rem as offizielle Eenheit för de Äquivalentdosis. As Ümreken gellt: 1 rem = 0,01 Sv.

Afgrenzen vun annere Eenheiten[ännern | Bornkood ännern]

Üm de Energiedosis vun ünnerscheedliche Strahlenorden beter verglieken to künnen, wat de möögliche Schaden för Organismen angeiht, warrt se mit en Gewichtungsfakter multiplizeert, de as Strahlengewichtungsfakter betekent warrt. Dör dissen Fakter warrt de relative bioloogsche Wirksomkeit vun de Strahlen inbetogen, un dat Resultat warrt as Äquivalentdosis betekent.

De Strahlengewichtungsfakter is en Tall ahn Dimension, so dat de physikaalschen Grötten, de in de Eenheit Sievert angeven warrt, un de Energiedosis de glieke Dimension hebbt. De Eenheit vun de Energiedosis Gray (Gy) un dat Sievert bedüüt beide de vun de Strahlen an de Materie afgevene Energie op een Masseneenheit, also opletzt de Eenheit Joule pro Kilogramm. De verscheden Eenheiten, Gray för de Energiedosis un Sievert för de gewichten Dosisgrötten, deent in’n praktischen Bruuk aver dorto, den Ünnerscheed vun de Dosisgrötten to wiesen, vun wegen dat sich de Tall för de Dosisgrött över den Strahlenwichtungsfakter ok ännern kann.

So gellt för β- un γ-Strahlen en Strahlengewichtungsfakter vun een. Dormit gellt för disse Strahlenorden 1 Sv = 1 Gy. Bi Neutronen gellt de Fakter 10, un bi α-Strahlen is de Fakter 20. De Ünnerscheed kummt dör de Grött vun de Partikels, de bestimmt, wo dull de Wesselwirken mit dat bestrahlte Geweev is.

Weblenken[ännern | Bornkood ännern]

Borns[ännern | Bornkood ännern]

  1. Koort mit de över een Daag middelten Gamma-Oortsdosisleistung in de Bundsrepubliek Düütschland
  2. BM för Ümwelt, Naturschuul un Reaktersekerheit. Strahlenschuulverornen 2008, §5, § 46
  3. BM för Ümwelt, Naturschuul un Reaktersekerheit. Raatslag vun de Strahlenschuulkommisschoon 2001, Afsnitt 4.4.5
  4. Bundsamt för Strahlenschuul (BfS): Grenzwerte im beruflichen Strahlenschutz afropen an’n 30. März 2011