Sev Berd

Vun Wikipedia
Zur Navigation springen Zur Suche springen
Festung Sev Berd (2013)
Ingang na de Festung (2015)
Blick op’n Binnenruum vör’n Ümbo (2008)
Deel von de Festung mit de Moder-Armenien-Statue in’n Achtergrund (2014)
Histoorsch Bild von de Festung Alexandropol

Sev Berd (armeensch Սև բերդ, översett Swarte Festung; russ’sch Чёрная Кре́пость, Chornaya Krepost) is en verlaten Festung, de von de Kaiserlich Russ’sche Armee in’n Westen von de Stadt Gjumri (in de Provinz Schirak, Armenien) anleggt worrn is. De Festung is en natschonal Bodenkmaal von Armenien un driggt de Denkmaalnummer 8.1/2.

Historie[ännern | Bornkood ännern]

De Festung liggt acht Kilometer von de Grenz na de Törkie af. De Bo von de Festung weer en Reakschoon op’n Russ’sch-Törkschen Krieg von 1828/1829. De Stadt Gjumri is 1813 an’t Enn von’n Russ’sch-Persischen Krieg mit’n Freden von Gulistan Deel von dat Russ’sche Kaiserriek worrn un hett to de Tied noch Kumajri heten.

De Bo von de Festung hett 1834 anfungen. De Festung leeg op’n Topp von en lütten Barg. De Bo is aver eerst 1847 trech worrn. Wieldes hett de Stadt 1837 den ne’en Naam Alexandropol kregen (nadem Zar Nikolaus I. de Stadt besöcht hett, to Ehren von’n Zar sien Fro, Alexandra Fjodorowna).

De Anlaag is kumplett rund un ut swarte Steen boot. Dorvon hett de Festung ok ehren Naam kregen. Na’n Krimkrieg is de Festung noch wedder utboot worrn un hett den Rang von en Festung Eerste Klass kregen.

De Festung is nienich belagert worrn, harr aver strateegsch Bedüden in’n Russ’sch-Törkschen Krieg von 1877/1878. Nadem Russland in düssen Krieg Festungen in Kars un Batumi innahmen harr, is de Festung in Alexandropol to en Festung twete Klass rafstuft worrn.

In de Johren 1940 is blangen Sev Berd de Russ’sche 102. Militärbasis anleggt worrn, de bet vondaag besteiht.

1975 is blangen Sev Berd ok de Moder-Armenien-Statue von Gjumri boot worrn.

De Russen hebbt de ole Festung later an dat armeensche Ministerium för Verdeffenderen övergeven. 2005 is se an Hajk Hajrapetjan verköfft worrn un 2012 von Hajrapetjan an de Familie Balasanjan. De aktuelle Besitter is Samvel Balasanjan (gliektiedig Börgermeester von Gjumri), de de Festung as Kunzerthall un as en Hotel herricht hett. Ok en Museum is dor inricht.

Weblenken[ännern | Bornkood ännern]

Commons-logo.svg Sev Berd. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:40° 47′ N, 43° 50′ O