Schoolsystem vun Uganda

Vun Wikipedia
Zur Navigation springen Zur Suche springen

Dat Schoolsystem vun Uganda baseert op dat Schoolsystem vun Grootbritannien. Tostännig för de Scholen is de Zentralregeren in Kampala un dat Ministerium för Utbillung un Sport. In Uganda sünd för meist all Volksscholen un högere Scholen Schoolgeböhren to betahlen. Dorvun utnahmen sünd middewiels aver de eersten veer Kinner, solang de na Volksschool gaht. Dat Schoolsystem in Uganda is in de Gööd temlich verscheden. In de Stadt is dat beter organiseert, op’t Land gifft dat faken veel to wenig Scholen.

Historie[ännern | Bornkood ännern]

De eersten Scholen geev dat üm 1890 in Uganda. De Missionare vun anglikaansche un kathoolsche Kark hebbt jem grünnt. 1924 geev dat de eerste högere School, dat Makerere-Kolleg, dat 1963 Deel vun de Universität Oostafrika woorn is un siet 1970 as Makerere-Universität ene egenstännige Universität billt.

1950 geev dat 53 högere Scholen in Uganda. Blots dree hören den Staat to, dree weren privat, de Rest weer vun de Karken.

Noch bet 1974 hebbt de Scholen tomehrst engelsche Schoolmaterialien un Lehrplään bruukt. 1975 hebbt se egene Lehrplään opstellt. Doch in de Tiet vun Idi Amin un de twete Tiet ünner Milton Obote güng dat bargdal mit de Qualität vun de Utbillung an de Scholen in Uganda.

1989 güngen 18 Perzent vun den Staatshuusholt vun Uganda in de Bildung.

De Natschonale Raat för Högere Utbillung is 2003 insett worrn un hett de Opgaav, Översicht över de Hoochscholen in Uganda to öven.

Dat Schooljohr is indeelt in dree Delen. De eerste geiht vun Februar bet April, de twete vun Mai bet August un de drüdde vun September bet Dezember. Dortwischen sünd jümmer dree Weken Ferien, na’n drüdden Deel duurt de Ferien sogor meist söss Weken.

Schooluniformen sünd in Uganda wiet verbreedt. Se hebbt faken ok en Teken vun de School dor op. Dat Utsehn vun de Uniform bestimmt dorbi jede School sülvst.

[1] 1965 1970 1975 1980 1985 1989
Volksschool 580 727 918 1.292 2.117 2.532
Högere School 16.000 37.000 46.200 75.200 160.200 265.000
Makerere-Universität 900 2600 3400 4000 5300 6300
Annere högere Institute n.a. n.a. n.a. n.a. 1740 2600

Vörschool[ännern | Bornkood ännern]

De Vörschool in Uganda warrt nich vun den Staat kuntrolleert, de Vörscholen sünd privat organiseert. Üm un bi teihn Perzent vun de Kinner besöcht Vörscholen.

Volksschool[ännern | Bornkood ännern]

Na de Volksschool gaht de Kinner, wenn se söss Johr oolt sünd. De Volksschool duurt söven Johr lang. Na de söövte Klass maakt de Kinner ehr Grund-Afslussexaam. Wenn de good utfallt, köönt se op de högere School gahn.

Siet 2006 warrt in de eersten dree Johren de Ünnerricht in de inheemschen Spraken afholen. Vun Anfang an warrt aver Engelsch lehrt, dat vun de veerte Klass an de Ünnerrichtsspraak is.

1989 güngen üm un bi 2,5 Millionen Kinners na de Volksschool (Klassen 1-7, 6-12 Johr oolt). 1980 weren dat noch 1,3 Millionen wesen. Todem güngen 80.000 op private Scholen. So bedrievt to’n Bispeel de Orthodoxe Kark 35 Scholen mit 10.000 Schölers.

Alltohoop weren dat 1989 en beten mehr as 50 Perzent vun all Kinners twischen söss un twölf Johren, de na School güngen. Blots 61 Perzent sünd de vullen söven Johren na School wesen, 25 Perzent hebbt dat op en högere School schafft.

Högere Scholen[ännern | Bornkood ännern]

De högere School duurt op den O-Level veer Johr lang, de Kinner sünd denn 13-16 Johr oolt. An de O-Level slutt sik de A-Level an, de noch wedder twee Johr duurt (de Schölers sünd denn 17-18 Johr oolt).

265.000 Schölers güngen op högere Scholen, 216.000 dorvun op den O-Level, 22.000 op den A-Level. 22.000 güngen na Lehrerseminars (veer Johr lang) un Technische Instituten (dree Johr lang), 4.400 op högere Lehrerseminars (+ 2 Johr) un Technische Instituten. De Afsluss op den O-Level is nödig, dat de Schölers na Universitäten oder Lehrerseminars gahn köönt.

De bekanntste högere School is dat Königliche Kolleg Budo in de Neegd vun Kampala.

Hoochscholen[ännern | Bornkood ännern]

Uganda hett veer apentliche un veerteihn private Universitäten. Todem gifft dat üm un bi 50 Institutschonen mehr, de högere Bildung anbeden doot.

Anerkannte Institutschonen (Tallen vun 2003/2004):

  • 4 apentliche Universitäten
  • 12 private Universitäten
  • 10 natschonale Lehrerseminare
  • 5 technische Hoochscholen
  • 5 Handelshoochscholen
  • 5 Institute för Bueree un Tucht
  • 1 forstweertschopliche Hoochschool
  • 2 genossenschaftliche Hoochscholen
  • 1 Institut för Hotelwesen un Tourismus
  • 4 medizinsche Institute
  • 2 Beroopsinstitute
  • 2 meteoroloogsche/geoloogsche Institute
  • 3 Managementinstitute

Denn gifft dat noch negen Universitäten un twölv annere Institute, de noch kene Lizenz vun den Natschonalen Raat för Högere Utbillung hebbt.

Naam Grünnt Studenten 2003/2004
Apentlich:
Makerere-Universität 1970 35.532
Universität Gulu 340
Universität Mbabara 1989 594
Universität Kyambogo 2002 7.542
Privat:
Afdeel vun de Aga-Khan-Universität in Karachi, Pakistan 2001 18
Islaamsche Universität Uganda in Mbale 1988 2000
Nkumba-Universität in Entebbe 1994 3334
Universität vun de Mondbargen in Fort Portal 2005
Christliche Universität Uganda 1999 895
Christliche Universität Ndejje 1992 3332
Universität Nkozi vun de Kathoolsche Kark 1993 2670
Universität vun de Söventen-Dags-Adventisten Bugema 1948 1555 (2005/2006)
Universität Kampala 713
Universität Namasagali 473
Universität Busoga 1983 416
Universität Bugema 1500
Internatschonale School för Medizin Kigezi 162
Internatschonale Universität Kampala 1100

Footnoten[ännern | Bornkood ännern]

  1. http://lcweb2.loc.gov/frd/cs/uganda/ug_appen.html#table3

Weblenken[ännern | Bornkood ännern]