Sassen in Gallien
Nadem sik Sassen, Chauken un annere germaansche Stämm in de Tied twischen dat 2. un 4. Johrhunnert to den Sassenbund tohoopdaan harrn, sünd de Sassen veel as Hannelslüüd, aver ok as Seerövers in de Noordsee, in’n Kanaal un an de franzöösch Atlantikküst ünnerwegens wesen. En groten Deel Sassen is in dat 5. Johrhunnert denn na England gahn un hett tohoop mit Jüten un Angeln Königrieken grünnt. To de glieke Tied hebbt sik aver ok Sassen in Gallien dallaten.
De Küst von Gallien warrt al in de Notitia dignitatum as Litus Saxonicum betekent, also sassesche Küst. De Notitia dignitatum stammt ut de Tied so Enn dat 4. oder Anfang dat 5. Johrhunnert. To de Tied weer dor villicht eenfach noch mit meent, dat dat de Küst weer, wo de sasseschen Seerövers togang weren, gegen de sik de Römers to wehren harren. Villicht weer dor aver ok al mit meent, dat to de Tied al Sassen an de Küst leevt hebbt.
Otlingua[ännern | Bornkood ännern]
Otlingua weer en olen Go von de Sassen in’t Bessin. Wohrschienlich sünd dat desülven Sassen, de ok bi Gregor von Tours al twee Maal as Saxones Bajocassini vörkaamt. Gregor von Tours snackt von twee Begeevnissen 578 un 590, bi de de Sassen mit de Bretonen tohoopdrapen sünd. Chilperik I. von Neustrien harr jem gegen de Bretonen ünner Waroch in’n Krieg schickt.
De Naam Otlingua kummt in en Oorkunn von Korl den Kahlen von’n 13. November 843 (in comitatu Baiocasinse in pagello qui dicitur Otlingua Saxonia) un in dat Capitulare missorum Silvacense ut’n November 853 vör.
Archäoloogsch nawiest sünd de Sassen ünner annern dör en Grafffeld ut dat 6. Johrhunnert in Giberville un en Grafffeld ut dat 5. Johrhunnert in Sannerville.
Loire-Münn[ännern | Bornkood ännern]
En annere Grupp von Sassen hett sik op de Eilannen an de Münn von de Loire dallaten. Disse Grupp weer bet in’t 6. Johrhunnert unafhängig un is denn von’n Bischop von Nantes ünnerkregen worrn un na’t Christendom övergahn.
Boulonnais[ännern | Bornkood ännern]
Noch en annere grote Grupp Sassen hett dat in’t Boulonnais in de Gegend twischen Boulogne un Calais geven. Disse Grupp is ok archäoloogsch bekannt ut en Grafffeld ut dat 5. un 6. Johrhunnert in Nouvien-en-Pontieu.