São Miguel (Distrikt)
São Miguel is en Verwaltensrebeet (Concelho) vun’t Eiland Santiago in de Republiek Kap Verde. De Concelho ümfaat blots de een Karkengemeen São Miguel Arcanjo.
Geografie
[ännern | Bornkood ännern]
De Concelho São Miguel liggt in’n noordööstlichen Deel vun’t Eiland un hett en Flach vun ruchweg 91 km². In’n de Gemeen leevt üm un bi 16.000 Minschen (Stand: 2005). De Hööftstadt is Calheta de São Miguel, woneem ok de meisten vun de Lüüd wahnt. Gröttere Naverstäder sünd Tarrafal in’n Noordwesten un Assomada in’n Süüden.
De Gemeen is över en gröttere Straat mit Tarrafal un mit de kapverdischen Hööftstadt Praia verbunnen, en Bargstraat verbinnt de Gemeen mit Assomada un Picos. Dat Rebeet an de Küst as ok de Dalen warrt för de Bueree nütt, wiel dat restliche Rebeet vun Bargland bestimmt warrt. Dorto höört ok en Deel vun de Serra da Malagueta in’n Westen, wat en Naturpark mit en schöne Barglandschop is. In de Gemeen gifft dat en poor Wooldstücken, aver ok veel Grasland un Buschwark.
Historie
[ännern | Bornkood ännern]De Concelho São Miguel is eerst 1991 entstahn. Dormols is de een Karkengemeen vun den fröheren Concelho Tarrafal afsplitt worrn, de vun nu an en egenen Concelho billt.
Weertschop
[ännern | Bornkood ännern]De Produkschoon vun Göder kunzentreert sik in de Gemeen São Miguel vör allen op de Bueree un op den Anbo vun Nehrmiddel. Dör de Küstenlaag speelt ok de Fischeree en gröttere Rull, foolgt vun’n Tourismus, de aver noch nich dull utprägt is. De Gemeen is vör allen ländlich präägt mit Utnahm vun’t Hööftstadtrebeet.