Roséwien
Roséwien is en Wien mit en teemlich helle Klöör ut blaue oder rode Druven, de jüst so as Wittwien vinifizeert warrt. Dorbi drööft de Beren nich oder blots wenige Stünnen op de Maische liggen. Afhangig dorvun, wo dull de Kuntakt mit de Berenhuut wesen is, kann de Roséwien ünnerscheedlich dull farvt wesen. De Klören gaht vun lachsklöört bit hen na kirschroot. In Düütschland is de Marktandeel vun Rosé in de letzten Johren vun 2 % op 8 % anstegen.[1]
Herstellverfohren
[ännern | Bornkood ännern]- De blauen Druven warrt ahn jem lütt to maken keltert, afpresst un denn as Wittwien ahn Sluten vergärt. Dorut warrt Wittharvsten oder düchtig helle Roséwienen.
- De blauen Druven warrt eerst na twee bit dree Daag op de Maische afpresst, wat Roséwienen mit düütlich rode Klöör gifft.
- Ut dat Gärfatt för Rootwien warrt na 12 bit 48 Stünnen ruchweg 10-15 % vun’n Moss ahn Pressen aftogen un dorna as Roséwien vinifizeert. Disse so nöömte Saignée-Methood hett den Bieffekt, dat de Rootwien, de torüch blifft, dör denn högeren Andeel an Sluten högere Kunzentratschonen kriggt.
- Wittwien warrt mit 10-20 % Rootwien mischt. Dit Verfohren warrt allgemeen to’n Herstellen vun Roséschuumwienen bruukt as ok för Roséchampagner. Anners is dit Verfohren aver nich tolaten.
- Rootwien warrt dör düchtig Schönen vun Tanninen freemaakt un dör Behanneln mit Aktivkahl ophellt.
Roséwien, de na de Saignée-Methood maakt warrt, is also en Biprodukt vun de Rootwienherstellen. Annere Wienbuern bruukt för jemehrn Roséwien de Oorn vun junge Wienanlagen, de nich so kunzentreerte aver fruchtigere Wienen bringt. Dorüm sünd to’n Bispeel in vele franzöösche Appellatschonen för Rootwienen ok Roséwienen mit inslaten. Bispelen dorför sünd de Côtes du Rhône, Côtes de Provence, Rosé d’Anjou un Bordeaux Clairet. As de beste Roséwien vun Frankriek warrt de Tavel ansehn, de ok en poor Johren Buddelriep verdriggt
In’n Juni 2009 hett de EU-Kommisschoon na bannige Protesten vun Wienboverbännen en Gesettvörslag torüchtogen, de de Wienbuern Verlööf geven harr, Roséwien ok dör eenfachen Versnitt vun Root- un Wittwienen to maken. Dit Verfohren is buten de EU verlööft un warrt för de Produkschoon vun de eenfachsten Roséwienen insett. De Freegaav vun dit Verfohren weer in den Sinn vun de Wienmarktreform vun 2007 wesen, de to’n Teel hett, de europääschen Wientügers vun Nadelen freetomaken. Man, sünners de süüdfranzööschen Rosé-Wienbuern weern bang, dat jemehr Produkten dördor en slechteren Roop kriegen künnen. Annere Wienboverbännen hebbt sik jem anslaten.[1]
Beteken
[ännern | Bornkood ännern]In Öösterriek warrt de na dit Verfohren herstellte Wien Gleichgepresster nöömt. In de düütschsprakigen Swiez warrt dorto Süssdruck seggt. En Roséwien vun’n Laatburgunder warrt in Neuenburg un Gent dorgegen as Œil de Perdrix betekent.
Glieke oder sünnere Wientypen in Düütschland sünd de Wittharvst un de Rootling oder Schillerwien. Na dat düütsche Wienrecht mutt de Wittharvst in’n Ünnerscheed to annere Roséwienen to 100 % ut de glieken roden Wiensoort ut de glieken Laag maakt warrn. Anners hett en Versnitt-Andeel vun bit to 15 % oder 25 % mit de Söötreserve keen Utwirken op de Beteken. Bispeel: En Rüdesheimer Burgweg Laatburgunder Rosé dröff 15 % Blauen Portugeser bargen.
Nich mit den Rosé to verwesseln is de Rootling oder Schillerwien, de ut Rootwien- un Wittwiendruven keltert warrt.
In eenige Wienborebeden sünd to’n sünnern Andeel ok witte Wiensorten för den Rootwien tolaten. Bispelen dorför sünd Châteauneuf-du-Pape un Côte-Rôtie in’t franzöösche Rhônedaal oder de itanlieensche Chianti. In dissen Fall ahnnelt sik dat aver nich üm en Roséwien un ok nich üm en Rootling.
