Robert Swan
Robert Swan, OBE, FRGS (* 28. Juli 1956 in Durham in England) is en britisch Polarforscher un Ümweltschuuler. He is de eerste Minsch, de beid geographisch Pole to Foot reckt hett. Swan sett sück besünners för den Schuul vun de Antarktis in.
Nah en Studium vun de Olt Geschichte an de University of Durham, dat Swan mit den Bachelor-Grad afsluuten dee, hett he af 1979/80 bi dat britisch Polarforschensprogramm British Antarctic Survey arbeit. In’ Rahmen vun en Antarkis-Expeditschoon up de Sporen vun Robert Falcon Scott (In the Footsteps of Scott-Expedition) reck Swan an’ 11. Januar 1986 to Foot den geographischen Süüdpool.
Dree Johr later nehm Robert Swan an de internatschonale Arktis-Expeditschoon Icewalk deel, to deren Liddmaaten ok Arved Fuchs hörrn dee, un reck an’ 14. Mai 1989 ok den geographischen Noordpool. He is dormit de eerste Minsch, de beid Pole to Foot reckt hett. (Arved Fuchs nehm in dat sülvig Johr ok noch an en Süüdpool-Expeditschoon deel un is dormit de eerste Minsch, de beid Pole binnerhalv vun een Johr to Foot reckt hett.)
Bi sien Reisen in de Polarrebeeden wurr Robert Swan up de Ümweltprobleme dor upmarksom (Müll, Ozonlock, globale Erwärmung) un sett sück siether för den Umweltschuul in. So grünn he de Organisatschoon 2041, de sück dorför insett, dat Umweltschuulprotokoll to’n Antarktisverdrag över 2041 rut to verlängern. Buterdem weer Swan as Sonnerbotschopper för dat Umweltprogramm vun de Vereente Natschonen (UNEP) un de UN-Organisatschoon för Ertrecken, Wetenschap un Kultur (UNESCO) tätig.
Robert Swan harr Gastprofessuren an verscheeden Universitäten un wurr völfack uttekent. So hett hüm de britisch Königin Elisabeth II. för sien wetenschaplich Leistungen 1988 de Polar Medaille verleeht un hüm 1995 to’n Offizier vun den Order of the British Empire (OBE) nömmt. Buterdem is he Liddmaat (Fellow) vun de Royal Geographical Society.
Warken[ännern | Bornkood ännern]
- Robert Swan / Gil Reavill: Antarctica 2041: My Quest to Save the Earth's Last Wilderness New York 2009, ISBN 978-0-7679-3175-5