Robert Bruce Merrifield

Vun Wikipedia

Robert Bruce Merrifield, nömmt Bruce Merrifield, (* 15. Juli 1921 in Fort Worth, Texas; † 14. Mai 2006 in Cresskill, New Jersey), weer en US-amerikaansch Chemiker, de 1984 den Nobelpries för Chemie tospraaken wurr.

He weer de eenzig Söhn vun George E. Merrifield un Lorene, borene Lucas. 1923 truck de Familie nah Kalifornien, wo he up negen Grundschoolen un twee High Schools gung, bevör he 1939 den Schulafsluss an de Montebello High School maaken dee. Dor entwickel he ebenso en Interesse för de Chemieas ok för de Astronomie.

Nah twee Johren an dat Pasadena Junior College wessel he to de University of California, Los Angeles (UCLA), wo he 1943 den Bachelor Afsluss in Chemie maaken dee.Dornah hett he een Johr 1943/44 bi de Philip R. Park Research Foundation arbeit, bi de he sück um en Kolonie vun Versöökdeerten kümmern dee un bi Experimenten to dat Wassdom vun synthetischen Aminosüeren assisteeren dee. En vun disse Experimente hett as eerst wiest, dat de erforderlichen Aminosüeren to glieker Tiet vörhannen ween mooten, um en Wassdom mögelk to maaken.

Dornah kehr he wegen en Promotschonsstudium to den Fackberiek Chemie vun de UCLA torüch, wiels he dor to glieker Tiet Assistent för Chemie in de Medical School vun de UCLA weer. Mit den Perfesser för Biochemie M. S. Dunn entwickel he mikrobiologische Methoden för de Quantifizeeren vun de Pyrimidine. Een Dag nah de Promotschoon an' 19. Juni 1949 hett he Elizabeth Furlong heiraadt un begeev sück an den dorupfolgen Dag nah New York un to dat Rockefeller Institute for Medical Research (de latere Rockefeller University), wo he Assistent för Biochemie weer. 1953 wurr he Liddmaat vun dat Rockefeller Institute. Af 1957 weer he dor Assistant Professor un later Perfesser, af 1984 as John D. Rockefeller Jr. Professor. Af 1993 weer he Professor Emeritus. 1969 weer he Nobel-Gastperfesser an de Universität Uppsala.

1963 hett he de vun hüm entwickelt Fastphasensynthese vun Proteinen un Peptiden bekannt maakt. De Hööftidee besteiht dorin, dat biologische Moleküle as Proteine oder Peptide lineare Polymere dorstellen un dat bi deren Synthese dat en Enn' an en Matrix koppelt wurrn kann. Disse Methood wurr later ok up de Synthese vun Oligonukleotiden, Suckern un anner komplexe organisch Moleküle överdragen. Den Dörbröök vun disse Methood broch ahn Twiefel de Synthese vun de ut 124 Aminosüeren bestahn Ribonuklease A, de he 1969 tosommen mit Bernd Gutte realiseeren dee.[1][2]

Merrifield weer Liddmaat vun de National Academy of Science, Washington. 1969 kreeg he den Albert Lasker Award for Basic Medical Research, 1970 en Gairdner Foundation International Award un den Intra-Science Award, 1972 den Award for Creative Work in Synthetic Organic Chemistry vun de American Chemical Society, 1973 de Nichols Medal, 1979 den Alan E. Pierce Award un 1990 den Ralph F. Hirschmann Award in Peptide Chemistry. He weer Liddmaat vun de National Academy of Sciences. Merrifield weer mehrfack Ehrendokter (ünner annern University of Colorado, Uppsala, Yale, Boston College, Barcelona, Montpellier).[3]

Merrifield is an' 14. Mai 2006 nah lang Krankheit in dat Öller vun 84 Johren storven. He hett sien Fru, söss Kinner un 16 Enkel achterlaaten.[4]

He weer af 1969 Mit-Herutgever vun dat International Journal of Peptide and Protein Research.

Weblenken[ännern | Bornkood ännern]

Enkeld Nahwiesen[ännern | Bornkood ännern]

  1. G.F. Domagk: In "The 1984 Nobel prize for chemistry. Synthetic hormones and enzymes with Merrifield's peptide synthesizer", Dtsch. Med. Wochenschr. 1984, 109, 1901–1902.
  2. S. Sano: In "Work of Dr. Robert Merrifield, with special reference to the development of solid phase peptide synthesis", Tanpakushitsu Kakusan Koso 1985, 30, 51–53.
  3. Karrieredaten un Ehrungen nah American Men and Women of Science, Thomson Gale 2005
  4. Rachel Petkewich: In "Nobel Laureate R. Bruce Merrifield Dies At 84", Chemical & Engineering News, May 23, 2006.