Richard Duckwitz

Vun Wikipedia
Zur Navigation springen Zur Suche springen

Richard Duckwitz (* 28. Juni 1886 in Bremen; † 30. November 1972 in Bremen) weer Senator un in de leste Tied vun den 2. Weltkrieg as Stellvertreder mit de Upgaven vun eenen Bremer Börgermeester befaat.

He weer Söhn vun eenen Koopmann un Grootsöhn vun den Bremer Börgermeester Arnold Duckwitz. He besöch dat Gymnasium to Bremen un studeer denn in Heidelbarg, München un Marborg up Afkaat. Dor hett he ok sienen Doktor maakt (Dr. jur.). Den eersten Weltkrieg hett he as Suldaat mitmaakt. 1919 is he bi den Bremer Senat as Syndicus anfungen. To siene Upgaven hören Habens, Hannel un Schipperee. 1919 un 1920 is he kort Liddmaat vun de DDP ween. An'n 1. Oktober 1927 is he Raat vun den Staat wurrn. Ok dor hett he dat toeerst mit Habens, Schipperee un Verkehr to doon harrt. 1931 is he Präsident vun de Bremer Verwaltung för Finanzen wurrn. An'n 1. Mai 1933 is he in de NSDAP intreden un höör ok to annere Organisationen vun de Nazis mit to. In de Rieder-SA hett he dat 1943 bit to'n Sturmführer bröcht. Politsch hett he aber nich besunners veel vun sik hören laten. An'n 1. April 1943 is he Senator för Finanzen wurrn. As de regeeren Börgermeester Böhmker sturben weer, schull de Binnensenator Hans Jochen Fischer sien Upfolger weern, man de wurr as Stellvertreder to'n Rieksstattholler beropen. Dorto is to seggen, datt in de Nazitiet de Bremer Börgermeester nich so veel to seggen harr, vunwegen de Rieksstattholler em Vörschriften maken konn. Duckwitz hett also as Stellvertreder för eenen annern dat Amt vun den Bremer Börgermeester utöövt, man he weer süms keen Börgermeester. Ok Fischer is nich noch bito Börgermeester ween. Düt Amt weer nich anners besett, as man mit eenen Stellvertreder. Dat weer Duckwitz.

in'n April 1945 hett he sik dorför insett, Bremen nich gegen de Englänner to verdeffenderen, man he woll gegen de politschen un militärschen Föhrers in de Stadt denn doch nich gegenangahn un hett den Steert inknepen. So keem dat denn noch to allerhand Gefechten un Toschannenmaken in de Stadt.

Vun den 7. Oktober 1951 af an weer he wedder in de Bremer Börgerschup as Liddmaat vun de Düütsche Partei. Dor hett he dat to'n tweeden Vörsitter in dat Land bröcht. An'n 13. Februar 1962 is he ut düsse Partei uttreden un hett bi de CDU-Fraktion rinkeken.