Ribston Pepping

Ribston Pepping (ok Ribston Pippin) is en olle Sort vun’n Huusappel (Malus domestica), de al vör 1800 op de Lännereen vun’t Slott Ribston bi Knaresborough, Graffschop Yorkshire, as Tofallssaamling (1708 ut een vun dree Appelkarns, de ut de Normandie kemen) entstahn is u8n dor denn verbreedt weer.

Frucht

De Frucht is gliekmatig formt un vun middlere Grött (ruchweg 5-6 cm hooch un 6-7 cm in’n Dörmeter). Se hett en dröge, d. h. nich fettige, Schaal mit toeerst grööngele, bi tonehmen Riep vun blass-goldgele Grundklöör un en rode, striepte Deckklöör. Dat Fruchtfleesch is geelwitt un fast, warrt aver mit tonehmen Riep möör un is saftig. De Smack is sööt un aromaatsch, wat em bit hüüt to den bestsmeckenst Tafelappel maakt.

Ribston Pepping is en Winterappel, de vun MItt bit Enn Oktober riep to’n lücken is un vun Dezember af bit Februar riep to’n Geneet.

Boom

De Boom wasst levenslang middelstark un billt gau brede Kronen ut. He is egent för all Optuchtformen. An sien Standoort hett he hoge Anspröök: he bruukt en deepgrünnigen Bodden mit veel Nehrstoffen un hett geern Küstenklima mit en hoge Luchtfuchtigkeit un weeke Winters.

Disse hoge Anspröök föhrt dorto, dat de Sorte in kommerziellen Anbo kuum to finnen is. Butendem is he anfalalig för Mehldau. De triploide Sort is en slechten Pollenspenner.

Kiek ok

Literatur

Walter Hartmann: Farbatlas Alte Obstsorten. Eugen Ulmer. Stuttgart 2003.
G. Friedrich, H Petzold: Handbuch Obstsorten. Ulmer Verlag. Stuttgart 2005. ISBN 3-8001-4853-6. Siet 138.

Weblenken