Oaveriessel
Oaveriessel ([ˌɒːvərˈiːsl̩] nedderlandsch Overijssel) is en Provinz vun de Nedderlannen. Dat liggt in’n Osten vun’t Land un grenzt to de Düütsche Bundslänner Neddersassen un Noordrhien-Westfalen, un in de Nedderlannen to de Provinzen Freesland, Drenthe, Gelderlaand un Flevoland. De Hansestadt Zwolle is de Hööftstadt vun de Provinz. Dat gifft hüüd 25 Gemeenden; bit 2001 gaff dat 44 Gemeenden.
De grootste Stroom is de Iessel in’n Süüdwesten. (De Naam vun de Provinz kummt dorher, dat in dat Middelöller de Gegend bi’t Rebeet vun’t Bisdom Utrecht höört hett, un vun Utrecht ut sehn över de Iessel liggt.) De dree wichtigste Kanalen sünd dat Twentekanaal, dat Kanaal Almelo-De Haandrik un dat Zwolle-IJsselkanaal. Zwolle is en Knotenpunkt in’t Nedderlandsche Iesenbahnnett. Dat gifft in de Provinz ok en lütt Flughaven, Enschede Airport Twente bi de Stadt Eanske.
De Tanknbaarg bi Oldnzel hett ene Hööchde vun 82 m över NN un is dat hoogste Punkt vun de Provinz. Twischen de Dörpen Heldern un Holtn liggt de Sallandse Heuvelrug; en Deel dorvun höört to’n Nationaal Park Sallandse Heuvelrug. De Bült in dat Rebeet ward 'Bargen' nennt, dorto de Haarlerbarg un de Hoolterbarg. In de Kopp vun Oaveriessel gefft dat dat Naturschutzrebeet De Wieden, de Natschonalpark De Weerribben un to’n Bispeel dat Waterdörp Gietern mit ehr lütten Grachten un Holtbrüchen.
In Oaveriessel warrt neben dat Nedderlannsch ok Neddersassisch snackt. De dree Gruppen vun dat Neddersassisch in Oaveriessel sünd dat Tweants (in de Region Twente in’n Osten), dat Stellingwarfs (in de Kopp vun Oaveriessel in’n Nordwesten), un dat Sallaans (in Sallaand, dat Rebeet dortwischen). De Spraak löppt över de Staatsgrenz; in dat düütsche Rebeet an de Grenz snackt de Lüüd dat Graafschupper Platt un dat Mönsterlänsk.
Drenthe • Flevolaand • Freesland • Gelderlaand • Grunneng • Limborg • Noord-Braobant • Noord-Hollaand • Oaveriessel • Seelaand • Süüd-Hollaand • Utrecht