Pickert

Vun Wikipedia
Zur Navigation springen Zur Suche springen
Lippsker Pickert

Pickert is eune Spezialität iut Austwestfolen-Lippe un dat süüdaustlike Ossenbrügger Land un kükt meust iut os eun Pannkeoken, is öbber man iut rüiven Kartuffeln maakt.

Weordafkumst[ännern | Bornkood ännern]

Dat Weord Pickert kümmt van dat plattdüütsche Verb pecken (kleven) af, denn de Deug is büi’t Kneden derbe peckig un backig.[1]

Oorten van Pickert[ännern | Bornkood ännern]

Lippsker Pickert[ännern | Bornkood ännern]

Lippsker Pickert kükt iut os en Pannekeoken un wurr fröher besünners den Sunndag Avend, am auk to wichtigen Begüivnissen, backen. Faken eet eun de Pickert ok düht late os en Nachtmohl. Ehrdaag was de Pickert, wat dat blaut de Luie, de en karget un armet Lieven fohrn, eten. Vandage weert de Pickert os ene lippske Spezialität ankeken. De Ingredenzien van de Deug sind Gest, Melke, Mehl, Euer, rüiven Kartuffeln. Faken kümmt ok Rosinen in de Pickert rin. Boven up de Pickert smöört de Lipper nich blaut seute Saken os Plumenmuus, Marmelade, Appelmuus oder Rövensappe, man ok lippske Leverwosst.

Teo’n drinkt de Lipper na Briuk un Herkumst Kaffee. De Pickert gillt ol van de 18.Johrhunnert an[2], os gans typisk för dat Lipperland un wurr fröher meust jeuden Sunndag eten. In Lippe seggt en seogor, dat de Pickert dat lippske „Natscheonaalgericht“ is[1]. De Schrüiver August Wiemann schreev in en lüttje Geschichte över den Pickert:

Wat'n aulen Lipper es, de kann sick keunen Sunndag eohne Pickert denken. Pickert hoiert teo'n Sunndage os de Kuckuck teon Freohjohrswaule un os de Brui'm teo 'er Briut.[3]

Westfölsker Pickert[ännern | Bornkood ännern]

„Westfölsker Pickert“, auk „Lappenpickert“ noimt, is auk iut rüiven Kartuffeln. In de Deug gifft eun denn auk noch Mehl, Euer, Melke un Solt teo. Gest, os büi den Lippsken Pickert kümmt nich rin, dorümme kükt de Westfölske Pickert auk os Lappen iut. De westfölsken Pickeets werrn gans suutje backt. Ehrdage möök en dat up euner „Pickertplatte“, vandage in’r Panne. Büi’t braden leggt man fetten smeukert Speck in de Panne, up dat de Panne fettig neog teo’n Braden is.

In de Senne, de fröher eune düht karge Giegend was, möök eun de Westfölsken Pickert nich mit Kartuffeln, man mit Beokweutenmehl. Man düsse Lappenpickerts wörn bannig täh. Dorümme see ma „Liarn Hinnerk“ (leddern Hinnerk) dor to.[4]

Kastenpickert[ännern | Bornkood ännern]

De Kastenpickert is eune Form van Pickert, de in’n Ramskenbrinkschen un üm Builefeld un Gütsel ümmerüm begäng is. De Deug is de glüike, man eun backt den Deug, os eun Braud in’r Kastenform. Wenn de Kastenpickert köhl is, snitt man enne in Schüiven un bradt de Schüiven nocheman in’r Panne an.

Weblenken[ännern | Bornkood ännern]

Nawüisen[ännern | Bornkood ännern]

  1. a b http://www.lipperland.de/lippischer-pickert/lippischer-pickert.html
  2. http://www.stadtdetmold.de/232.0.html
  3. http://www.kinder-lippe.de/Lippisch_Platt/Lippische_Geschichten/Kein_Sonntag_ohne_Pickert/kein_sonntag_ohne_pickert.html
  4. Siehe hierzu: Carin Gentner: Pickert. Ein Leibgericht der Senner Bauern. In: Horst Wasgindt/Hans Schumacher (Hrsg.): Bielefeld-Senne, Band 2. Eine siedlungsgeschichtliche Dokumentation mit Beiträgen zur Volkskunde und Heimatgeschichte. Bielefeld 1989, Seite 112-113