Phaeton (Planet)

Vun Wikipedia
Wesseln na: Navigatschoon, Söök

Phaeton (greeksch: de Strahlende) is de Naam vun en hypotheetschen Planet, de sien Ümloopbahn twüschen Mars un Jupiter hebben schülln. De Naam vun dissen vermodten Planet kummt ut de greekschen Mythologie, woneem dat de Binaam vun den Sünngott Helios is un to’n annern ok de Naam vun sien Söhn.

As Johann Daniel Titius 1766 de empirische Formel opstellt hett, de vundaag as de Titius-Bode-Reeg bekannt is un de de Proportschonen vun de Bahnafstännen vun de dormols bekannten Planeten beschrifft, füll em op, dat de Reeg blots denn de Afstännen vun Jupiter an dorstellen kann, wenn een tosätzlich noch en Planet twüschen Mars un Jupiter infögen deit.

Dorüm hett man in de Johren dorna anfungen, systemaatsch na dissen vermodten Planeten to söken, bit Giuseppe Piazzi 1801 in dat Rebeet, dat in Fraag keem, den Asteroiden (1) Ceres opdeckt hett. Vundaag warrt Ceres as Dwargplanet ansehn. Gau weern noch mehr Asteroiden twüschen Mars und Jupiter opdeckt, bit de grote Tall opletzt to den Begreep Asteroidengördel föhrt hett.

Wegen de utermatig grote Tall vun Asteroiden keem gau de Annahm op, dat sik dat bi de Asteroiden üm de Schören vun en Planet hannelt, de ut’neen reten worrn is. Disse Theorie hett sik aver as wenig wohrschienlich rustellt. To’n een is de Samtmasse vun all Objekten in’n Asterodiengördel neemlich lütter as de vun’n Maand vun de Eer, un to’n annern is dat wegen de Gravitatschoon vun’n Jupiter al so nich wohrschienlich, dat sik an de Positschoon ut de oorsprünglichen Planetesimalen en grötteren Himmelskörper billn künnt hett. Vun dorher geiht de Wetenschop vundaag dorvun ut, dat dat twüschen Mars un Jupiter nie en Planeten geven hett.

1983 is de Naam an den Asteroid (3200) Phaethon vergeven worrn. Disse Asteroid hett sien Bahn aver gor nich in’n Hööftgördel, man tellt to de eerdnegen Asteroiden.