Penn vun Maine

De Penn vun Maine is en norweegsche Pennmünt ut Sülver, ut de Tiet as Olaf Kyrre König weer. De Münt hebbt se 1957 an de Goddard-Utgravungssteed funnen, wo en ole indiaansche Siedlung utgraven worrn is. Dat weer bi Naskeag Point, Penobscot Bay, in Maine. Se is de eenzige Fund, de vun de Wikingers herstammt, den se in de USA funnen hebbt. De Runensteen vun Kensington ut Minnesota dorgegen warrt as Fälschung ansehn. Ans gifft dat blots noch de Funnen ut L’Anse aux Meadows in Kanada, wo en Wikingerdörp utgraven worrn is.

De Münt is ut de Tiet twischen 1065 un 1080. Dat is mehr as 50 Johren later as de letzten Narichten, de wi vun Wienland-Reisen vun de Wikingers hebbt. De Fundsteed Goddard kummt ut de Tiet 1180 bet 1235 un de Lüüd, de dor leven, warrt as Vörfohren vun de Penobscot-Indianers ansehn.

Wie de Münt dor hen kamen is, dat is nich wiss. Wohrschienlich sünd de Wikingers dor nich sülvs wesen. Vun de Münt afsehn, hebbt de Utgravers nix funnen, wat de Wikingers tohöört. Aver dat geev vele Funnen, de vun annere Völker ut’n Noorden kaamt, to’n Bispeel vun de Eskimos vun de Dorset-Kultur. Dorüm is de Penn woll dör Hannel twischen de Indianers ut Neefundland oder Labrador na Maine kamen.