Paläarktis

De Paläarktis

De Paläarktis, ok paläarktische Region nömmt, is in de Biogeografie de Naam for de „olen“ Landmassen vun Europa, Noordafrika bit to’n Süüdrand vun de Sahara un Asien (süüdlich bit to’n Himalaja, also ohn den Indischen Subkontinent un de Halfinsel vun Arabien). Dor kaamt denn noch de Eilannen to, de vor düsse Gemarken liggen doot.

De Paläarktis is tostanne kamen in dat Paläogen, wat de öllere Afsnitt vun dat Tiedoller vun dat Tertiär is. Dormols hefft sik in düsse Gemarken nee Planten utspunnen un nee Formen vun Deerter sünd upkamen.

Tohopen mit de Nearktis (=Noordamerika bit Noord-Mexiko un Gröönland) billt de Paläarktis de Holarktis up de nöördliche Halfkogel vun de Eer. Wie de enkelten Regionen toordent weern schöllt, dor hefft sik de Gelehrten over in de Plünnen. Gröönland warrt to’n Bispeel to de Nearktis torekent, man dat is to fragen, of dat richtig is. Just so mutt fraagt weern, of Gröönland to de Paläoarktis tellt weern kann. Last mit dat Afgrenzen gifft dat ok na de Paläotropis hen. So grenzt in’n Himalaja beide biogeographschen Regionen stracks an’nanner, un griept een so in de annere, dat een en poormol vun en Region in de annere wesseln deit, wenn een en poor Stunnen to Foot unnerwegens is. Düsse Wessel is goot ut to finnen, vunwegen, dat de Vegetation düütlich verscheden is.