Paat (Plant)

Vun Wikipedia
Pate, in Water insteken

Paten sünd Plantendeele, de afsneden oder afbraken wurrn sünd, vunwegen datt se Wuddeln ansetten schöllt. Up düsse Aart höört Paten to de Vegetative Vermehrung vun Planten.

An un for sik könnt all Plantendeele as Paten bruukt weern. Man mank de verschedenen Aarden vun Planten gifft dat en Unnerscheed, wecke Plantendeele an’n besten bruukt weern könnt. Dormit de Wuddeln beter wassen könnt, wenn se in’e Eer insett weert, warrt en Steekpuder bruukt, wo allerhand Wassstoffe in sitten doot. Man dat geiht bi de wecken Planten ok, wenn de Paten eenfach in Water insett weert. Towielen slumpt dat mit de Paten bloß, wenn de Luftfochtigheit hooch is. Gaarners, de Paten an Goornbo-Bedrieve utlevern doot, kniept de vun Mudderplanten af. Dat sünd grote Planten mit gode Egenschoppen. Vun eene Mudderplant weert um un bi dree Maande lang Paten afknepen.

Spraatpaten[ännern | Bornkood ännern]

Spraatpaten, Pelargonium peltatum

De Spitz vun en Stengel warrt in’e Eer steken. Sunnerlich bi holten Planten is dat wichtig, datt de Pate in de richtige Tied nahmen warrt. Wenn de Stengel noch nich holten noog is, is dat to fröh. Anners kann dat ok to laat ween, wenn de Tied al overhen is un de Spraat is al utriept.

Stengel- oder Twiegpate[ännern | Bornkood ännern]

En Deel vun en Stengel oder Twieg (Egolweg, of ut’e Midden oder vun’t Enne) warrt in’n Grund steken. Bi den Twiegpaten, ok Holtpaten nömmt, is dat wichtig, dat de Pate al riep is. En mutt dor goot up passen, dat de Stengel oder Twieg nich verkehrt rum in’n Grund steken warrt. En Ogenpate is en Stengelpate mit man bloß een Ooge. Dat gifft Goornbobedrieve, de geevt sik mit anners nix af, as man mit dat Utlevern vun so’n Aart vun Paten ohne Wuddeln. De weert vun düsse Bedrieve vun ehre Mudderplanten afknepen un direktemang up’n Weg na’n Kunnen brocht.

Blattpate[ännern | Bornkood ännern]

En Blatt warrt mit den Blattfoot in’n Grund steken oder platt up’n Grund leggt. Hen un wenn warrt dat Blatt ok in Stücke sneden un düsse Stücke weert denn up’n Grund leggt.

Wuddelpate[ännern | Bornkood ännern]

En Deel vun de Wuddel warrt in’n Grund leggt. Hier mutt de Grund sunnerlich fochtig bi ween.

Literatur[ännern | Bornkood ännern]

  • Fritz Köhlein: Pflanzen vermehren leicht gemacht, Eugen Ulmer, Stuttgart, 1972, ISBN 3-8001-6052-8
  • Fritz Encke: Pflanzen für Zimmer und Balkon, Eugen Ulmer, Stuttgart, 1964

Weblenken[ännern | Bornkood ännern]

Paten. Mehr Biller, Videos oder Audiodateien to’t Thema gifft dat bi Wikimedia Commons.