Otto von Struve
Otto von Struve (ok: Otto Struve; * 12. August 1897 in Charkiw, Russ’sch Kaiserriek; † 6. April 1963 in Berkeley (Kalifornien), USA) weer en russ’sch-US-amerikaanschen Astronom mit düütsch-baltische Afstammen.
Leven un Wark[ännern | Bornkood ännern]
Struve weer de Söhn vun den Mathematiker Ludwig von Struve un de Neffe vun Hermann von Struve. Na sien Schooltiet füng Struve 1914 an dat Fack Astronomie an de Universität vun Charkiw to studeeren, man sien Studium weer dör den Russ’schen Börgerkrieg ünnerbroken, in den he op Sieten vun de Witten Armee streden hett. Na’t Enn vun’n Krieg hett he sie Studium afslaten un för korte Tiet ok as Dozent lehrt.
1921 is Struve in de USA utwannert, woneem he gau al as assistant for stellar spectroscopy an de Yerkes-Steernwacht in Williams Bay, Wisconsin, anfüng. De Steernwacht höör to de University of Chicago. 1923 hett he dien Dokter maakt un steeg dat Johr dorop to’n Dozent in Yerkes op. 1925 hett he Mary Martha Lanning heiraat. De Eh bleev ahn Kinner, und so weer Otto von Struve de letzte Söhn vun de groten Astronomenfamilie Struve.
Al 1927 is Struve assistant professor worrn un hett dat sülve Johr ok de US-amerikaansche Staatsbörgerschop kregen. 1930 weer he associate professor un 1931 assistant director. Vun 1932 bit 1947 harr Struve as Direkter dat Regeer an de Yerkes-Steernwacht un arbeit togliek ok as Professer för Astrophysik an de Universität in Chicago.
In’t Johr 1939 hett de University of Texas at Austin ehr McDonald-Steernwacht in de Davis Mountains apenmaakt. Dat Regeer weer Struve överdragen. Ut Grünnen vun de Gesundheit hett von Struve sien Opgaven in Austin un Chicago 1950 opgeven un nehm en Roop vun de University of California, Berkeley an. Dor hett he an de astronoomschen Fakultät lehrt un harr dat Seggen över de Leuschner-Steernwacht, de to de Fakultät höörn de.
1952 is Struve Präsident vun de Internatschonalen Astronoomschen Union worrn. Dat Amt harr he bit 1955. Veer Johr later is he as Direkter vun’t National Radio Astronomy Observatory beropen worrn, wat he bit an’t Enn vun sien Leven utföhrt hett.
Blangen sien Arbeit weer he Rutgever vun dat Astrophysical Journal un befaat sik mit ümfangrieke spektroskoopsche Beobachten un theoreetsche Ünnersöken vun Steerns mit utdehnte Gashüllen, ännerliche Steerns, Dubbelsteerns un interstellare Materie. Bito hett he de beiden Asteroiden (991) McDonalda un (992) Swasey opdeckt.
Maatschoppen[ännern | Bornkood ännern]
1937 weer Struve in de National Academy of Sciences un in de American Philosophical Society,[1] un 1942 in de American Academy of Arts and Sciences wählt.[2] 1954 weer he as Liddmaat („Fellow“) in de Royal Society opnahmen.
Ehren un Utteken[ännern | Bornkood ännern]
- 1944: Goldmedaille vun de Royal Astronomical Society
- 1948: Bruce Medal vun de Astronomical Society of the Pacific
- 1954: Jules-Janssen-Pries
- 1957: Henry Norris Russell Lectureship
- De Maandkrater Struve, de Asteroid (2227) Otto Struve un dat Teleskop Otto Struve Telescope hebbt jemehrn Naam vun em.
Schriften[ännern | Bornkood ännern]
- Stellar evolution – an exploration from the observatory. Princeton University Press, Princeton 1950.
- Elementary Astronomy. 1959.
- hoochdüütsch: Astronomie – Einführung in ihre Grundlagen. 2., dörsehn Oplaag. de Gruyter, Berlin 1963.
- The universe. M.I.T Press, Cambridge 1966.
Literatur[ännern | Bornkood ännern]
- Margherita Hack et al.: Modern astrophysics – a memorial to Otto Struve. Gauthier-Villars, Paris 1967.
Weblenken[ännern | Bornkood ännern]
- Publikatschonen vun O. v. Struve in’t Astrophysics Data System
- Naropen op O. v. Struve in’t Astrophysics Data System
- Otto Struve Bibliography Sonoma State University
- Otto Struve, Astronomy: Berkeley University of California
- Guide to the Otto Struve Papers, 1837-1966 Online Archive of California
Borns[ännern | Bornkood ännern]
- ↑ Member History: Otto Struve, American Philosophical Society; afropen an’n 14. August 2018
- ↑ Members of the American Academy. Listed by election year, 1900–1949 (PDF; afropen an’n 29. September 2015