Ehrdermünner

Ehrdermünner; Oormünner
Systematik
Domään: Eukaryota ahn Rang: Amorphea ahn Rang: Opisthokonta ahn Rang: Holozoa ahn Rang: Veelzellers (Metazoa) Afdeel: Geweevdeerter (Eumetazoa) Ünnerafdeel: Tweesiedendeerter (Bilateria) ahn Rang: Ehrdermünner (Protostomia)
Wetenschoplich Naam
Protostomia
Grobben, 1908

De Ehrdermünner oder Oormünner (Protostomia) sünd en Stammgrupp mank de Geweevdeerter (Eumetazoa). De Mehrtahl vun all Stämme mank de Deerter warrt hier to rekent un de grote Masse vun all Aarden höört hier to. De Eerdermünner weert gegen de annere Grupp mank de Tweesiedendeerter (Bilateria) over stellt. Dor hannelt sik dat um de Latermünner (Deuterostomia) bi. Dat gifft en paar raare Stämm, dor is bitherto noch nich klaar, to wecke vun düsse beiden Gruppen se torekent weern könnt. Bi düsse Stämm hannelt sik dat unner annern um de Buukhaardeerter (Gastrotricha) un de Pielwörmer (Chaetognatha).

Wat Ehrdermünner sünd un wie se afgrenzt weert

To de Ehrdermünner weert na de Traditschoon de Deerterstämm hento rekent, de en vullstännigen Darmkanal hefft un de as Embryo toeerst den Mund utbillen doot ut den spleethaftigen Oormund, wieldes dat Achtergatt eerst later dörbreken deit oder ut dat achterste Deel vun den Oormund tostanne kummt. Wie de Mund bi de Ehrdermünner sik rutbillt, dat kann up allerhand verschedene Aart passeern.

Na de Traditschoon sünd de Huututtreckers (Ecdysozoa), de Lophotrochozoen (Lophotrochozoa) un de Plattwormhaftigen (Platyzoa) mank de Ehrdermünner insorteert wurrn. De Pielwörmer weert dor nich mehr torekent, vunwegen, datt se unner Umstänn en ganz egen Platz in dat System innehmt, af vun de annern. In jüngere Tied sünd ok annere Gruppen up en egen Platz umsett wurrn, as dat bi Unnersöken to de Xenacoelomorpha rutkamen is..Gegen de Latermünner (Deuterostomia) over sünd de Eerdermünner na de Meenung vun de meisten Forschers, de sik dor hüdigendags mit befaten doot, paraphyleetsch un stellt keen natüürliche Grupp in den Sinn vun de phylogeneetsche Systematik dor.

Systematik

• Huututtreckers (Ecdysozoa)
  • Nematoida
    • Fadenwörmer (Nematoda)
    • Snarenwörmer (Nematomorpha)
  • Scalidophora
    • Hakenrüsseldeerter (Kinorhyncha)
    • Peniswörmer (Priapulida)
    • Korsettdeerter (Loricifera)
  • Panarthropoda
    • Waterboren (Tardigrada)
    • Stummelfööt (Onychophora)
    • Lobopoden (Lobopodia) †
    • Liddfööt (Arthropoda), unner annern mit de Insekten, Spinnen un Kreefte
• Lophotrochozoen (Lophotrochozoa)
  • Weekdeerter (Mollusca), unner annern mit de Sniggen, Musseln un Dintenfische
  • Ringelwörmer (Annelida), unner annern mit de Mettjen
  • Lüttje Moosdeerter (Bryozoa)
  • Armfööt (Brachiopoda)
  • Egelwörmer (Echiura)
  • Snoorwörmer (Nemertea)
• Plattwormhaftige (Platyzoa)
  • Plattwörmer (Plathelminthes)
  • Kleihwörmer (Acanthocephala)
  • Cycliophora
  • Buukhaardeerter (Gastrotricha)
  • Lüttje Kevenmünner (Gnathostomulida)
  • Kelkwörmer (Kamptozoa)
  • Micrognathozoa
  • Dreihdeerter (Rotatoria)

Weblenken

Ehrdermünner (Protostomia). Mehr Biller, Videos oder Audiodateien to’t Thema gifft dat bi Wikimedia Commons.